“Sabah”ın baş məşqçisi Rimas Kurtinaytis FIBA Çempionlar Liqasının təsnifat mərhələsində “Norrçöpinq Dolfins”lə oyunu şərh edib.
Arena.az xəbər verir ki, Türkiyənin Antalya şəhərindəki “Qloriya Sports Arena”da təşkil olunmuş “Sabah” – “Norrçöpinq Dolfins” qarşılaşması Azərbaycan klubunun 71:75 (18:15, 19:18, 11:23, 23:19) hesablı məğlubiyyəti ilə başa çatıb.
Kurtinaytis İsveç təmsilçisinə məğlubiyyətdən sonra komandasının yenidən qurulduğunu qabardıb:
“Rəqibin oturmuş heyəti var idi. Komanda “onurğa sütunu”nu qoruyub. Bizdə isə komanda, demək olar ki, yenidən qurulub. Oyunçular arasında anlaşmanın daha yüksək səviyyədə olması üçün daha çox oyun keçirməliyik. Bir az zamana ehtiyacımız var. Buna baxmayaraq, düşünürəm ki, yaxşı çıxış etdik. Oyunçularımız əllərindən gələni etdilər. Qələbəyə yaxın olduğumuz anlar da oldu. Lakin sonluğu gətirə bilmədik. Adətən hakimlərlə bağlı fikir bildirmirəm. Amma bəzi oxşar epizodlarda fərqli hakim qərarlarının şahidi olduq”.
“Sabah”ın çalışdırıcısı rəqibin 3 xallıq atışlarda daha dəqiq oynadığını söyləyib:
“İsveç klubu 3 xallıq atışlarda daha dəqiq idi. Ribaundlarda da rəqibdən geri qalırdıq. Oyun intizamı baxımından “Norrçöpinq” daha yaxşı təsir bağışlayırdı. Hiss olunurdu ki, artıq uzun müddətdir bir yerdə çıxış edirlər. Oyuna çox yaxşı qoşulan Endərin zədələnməsi rotasiya imkanlarımızı azaltdı. Sona yaxın basketbolçularda yorğunluq var idi. İrəli baxmalıyıq. Mübarizəni FIBA Avropa Kubokunda davam etdirəcəyik. Bizim kimi Çempionlar Liqasının təsnifat mərhələsində mübarizəni dayandıran komandalar burada iştirak edəcəklər. Bu isə turnirin səviyyəsindən xəbər verir”.
Rimas Kurtinaytis komandanın 1/4 finala qədər gəlməsini uğur kimi qiymətləndirib:
“Sabah” yeni komandadır. Bizim buralara gəlməyiniz artıq uğurdur. Biz artıq Avropa basketbol ailəsinin üzvünə çevrilmişik. Hədəfimiz qrupdan çıxmaq olacaq. Bunun alınıb-alınmayacağını isə zaman göstərəcək. İstənilən halda, İsveç klubu ilə görüşdə olduğu kimi, hər oyunda son saniyəyə kimi təslim olmayan, mübarizə aparan komanda görəcəksiniz”.
