Qazaxıstan Respublikasının müdafiə naziri general-polkovnik Ruslan Jaksılıkov Astanada keçirilmiş “Birləşdik-2024” beynəlxalq əməliyyat-taktiki komanda-qərargah təlimi çərçivəsində Azərbaycan Respublikasının “Poliqon” hərbi-kosmik texnoloji jurnalına müsahibə verib.
POLİQON: Cənab nazir, Qazaxıstan Silahlı Qüvvələrində həyata keçirilən islahatlar, ordu quruculuğu sahəsində görülən işlər barədə nələri deyə bilərsiniz?
General-polkovnik Ruslan Jaksılıkov: Silahlı Qüvvələrin inkişafı davamlı prosesdir. Onların inkişafının məqsədi Qazaxıstan Respublikasının suverenliyini və ərazi bütövlüyünü təmin etməyə qadir olan kiçik, lakin eyni zamanda döyüşə hazır ordu yaratmaqdır.
Silahlı Qüvvələrin inkişafının əsas prinsipləri və yanaşmaları hərbi təhlükəsizliyin təmin edilməsi sahəsində (orta və uzunmüddətli dövr üçün) strateji proqram sənədlərində müəyyən edilib.
2021-2025-ci illər üçün Milli Təhlükəsizlik Strategiyası potensial təhdidlər, dövlətin məqsəd və vəzifələri dəqiqləşdirilməklə yenilənib, Silahlı Qüvvələrin qurulması və inkişafı konsepsiyasına uyğunlaşdırılması, prioritetləri dəqiqləşdirilməklə onların geosiyasi vəziyyətin dəyişməsinə uyğun inkişafı aparılıb.
Hərbi təhlükəsizliyin təmin edilməsi sahəsində sənədlərin iyerarxiyasını tənzimləyən yeni Hərbi Planlaşdırma Sistemi qəbul edilib.
Ali Baş Komandanın tapşırıqlarına uyğun olaraq Əlahiddə Ümumqoşun Ordunun inkişafı prioritet istiqamət kimi davam etdirilib.
Bundan başqa, ərazi qoşunları inkişaf etdirilir. Onlardan əvvəlcə pandemiya zamanı istifadə olunub, daha sonra yanğınların və daşqınların aradan qaldırılması zamanı müntəzəm istifadə edilib. Ərazi müdafiəsi dövlətin hərbi təhlükəsizliyinin təmin edilməsinin ümumi sisteminə daxildir.
Ötən il biz 1200-dən çox taktiki təlim keçirmişik. Bu təlimlərdə qərargahın və qoşunların böhranlı vəziyyətlərdə və xüsusi hərbi əməliyyatlar zamanı fəaliyyətə hazırlığının keyfiyyətinin yüksəldilməsinə diqqət yetirilib.
Dövlət başçımızın tapşırığına uyğun olaraq ilk dəfə rayon icra hakimiyyətinin başçısı və onların müavinləri ilə müşavirə keçirilib. Oxşar tədbirlər müharibə dövrü hökumətinin və regional müdafiə şuralarının işinin təşkili məsələlərinə dair nazirlər və parlament üzvləri ilə də keçirilib.
Onu da qeyd edim ki, Qazaxıstan Silahlı Qüvvələri davamlı olaraq beynəlxalq təlimlərdə iştirak edir ki, bu da onlara xarici ordularla təcrübə mübadiləsi aparmağa imkan verir.
Son beş ildə Qazaxıstan sülhməramlı fəaliyyətini ciddi şəkildə gücləndirib. Qazaxıstan BMT missiyası üçün müstəqil mandat alan yeganə MDB ölkəsidir. Bu il martın 15-də ilk dəfə olaraq Qazaxıstan kontingenti (139 hərbi qulluqçu, 26 silah və hərbi texnika) “BMT-nin Qolan Təpələrində Atışmanı Müşahidə etmək Qüvvələri” missiyasına göndərilib.
ŞƏT-ə sədrlik çərçivəsində bu ilin aprelində Astanada müdafiə nazirlərinin, mayda isə Almatıda KTMT-yə üzv ölkələrin Müdafiə Nazirləri Şurasının iclası keçirilib.
Hərbi xidmətin cəlbediciliyinin artırılması istiqamətində işlər davam etdirilir. 6 minə yaxın çağırışçı kredit məzuniyyətindən yararlanıb. Hərbi xidmətdə olan 600-dən çox əsgər ali məktəblərə daxil olub.
Çağırışçıların hərbi komissarlığa getmədən öz məntəqələrində qeydiyyata alınması prosesi avtomatlaşdırılıb. Bu, hər il 1 milyard tengedən (2.1 milyon ABŞ dolları) çox məbləğə qənaət etməyə imkan verib (nəqliyyat, tibbi xidmətlər, qeydiyyat şəhadətnaməsi və s.). Habelə, “Çağırışçılar 2.0” rəqəmsal platforması istifadəyə verilib. Sistem avtomatik olaraq reytinqi müəyyənləşdirir və çağırışçıları ali məktəblər arasında bölüşdürür və onların elektron kitabxanaya çıxışını təmin edir.
Prezidentin tapşırığı ilə Hərbi-Vətənpərvərlik Tərbiyəsi Konsepsiyası hazırlanıb və 8 minə yaxın gənclər təşkilatını birləşdirən “Hərbi-Vətənpərvərlik Tərbiyəsi Mərkəzi” fəaliyyət göstərir.
“Aibin” gənclər toplantısı hər il keçirilir. Artıq ikinci ildir ki, toplantıda xarici ölkələrin nümayəndələri iştirak edirdi.
Böyük Vətən Müharibəsi 2024-cü ildə Qazaxıstan Silahlı Qüvvələrində suveren Qazaxıstanın ilk müdafiə naziri, Sovet İttifaqı Qəhrəmanı Xalıq Kakarmanın, ordu generalı Saqadat Nurmaqambetovun, eləcə də digər qəhrəmanların 100 illik yubileyinin qeyd edilməsi ilə keçirilib.
POLİQON: Qazaxıstan Ordusunun modernləşdirilməsi istiqamətində mühüm işlərin görüldüyünün şahidi oluruq. Bu istiqamətdə görülən işləri və əldə olunan nəticələri necə dəyərləndirirsiniz?
General-polkovnik Ruslan Jaksılıkov: Qazaxıstan ordusunun modernləşdirilməsi dövlətimizin milli təhlükəsizlik sahəsində əsas prioritetlərindən biridir. Son illər biz bu istiqamətdə xeyli irəliləyiş əldə etmişik. Hərbi təhsil və təlimdə qabaqcıl texnologiyaların tətbiqi, silah və hərbi texnikanın yenilənməsi, eləcə də infrastrukturun müasirləşdirilməsi – bütün bunlar bizə ölkənin müdafiə qabiliyyətini əhəmiyyətli dərəcədə gücləndirməyə imkan verir. Məqsədimiz təkcə hərbi texnikanın kəmiyyət və keyfiyyət üstünlüklərini təmin etmək deyil, həm də istənilən çağırış və təhlükələrə operativ reaksiya verə bilən yüksək səmərəli və çevik idarəetmə strukturu yaratmaqdır.
Modernləşmə müasir hərbi praktikada getdikcə əhəmiyyət kəsb edən kibertəhlükəsizlik və informasiya texnologiyaları sahələrini də əhatə edir. Rəqəmsal həllərin tətbiqi təkcə döyüş əməliyyatlarının səmərəliliyini artırmağa deyil, həm də mühüm informasiya ehtiyatlarının mühafizəsini təmin etməyə imkan verir.
POLİQON: Cənab nazir, Qazaxıstan ordusunun döyüş hazırlığının yüksəldilməsi istiqamətdə atılan addımlar və tədbirlər planı barəsində oxucularımıza məlumat verməyinizi istərdik…
General-polkovnik Ruslan Jaksılıkov: Ordumuzun döyüş hazırlığının artırılması onun fəaliyyətinin müxtəlif istiqamətlərini əhatə edən çoxmərhələli prosesdir. Bu prosesin tərkib hissəsi kimi biz təhsil və təlim sistemini fəal şəkildə təkmilləşdirir, hərbi kadrlarımızın hazırlanması üçün müasir metod və texnologiyaları tətbiq edirik. Döyüş bacarıqlarının və taktiki hazırlığın təkmilləşdirilməsinə xüsusi diqqət yetirilir ki, bu da qüvvələrimizə müxtəlif şəraitlərdə səmərəli fəaliyyət göstərməyə və dəyişən mühitə uyğunlaşmaq imkanı verir.
Biz həmçinin beynəlxalq hərbi əməkdaşlığı və çoxmillətli təlimlərdə iştirakı fəal şəkildə inkişaf etdiririk ki, bu da təcrübə mübadiləsinə və tərəfdaşlarla qarşılıqlı əlaqələrin təkmilləşdirilməsinə şərait yaradır. Bu təşəbbüslər ordumuzda özünəinam hissini və milli maraqları səmərəli şəkildə qorumaq, xalqımızın təhlükəsizliyini təmin etmək bacarığını gücləndirmək məqsədi daşıyır.
Beləliklə, Qazaxıstan Silahlı Qüvvələrinin döyüş hazırlığının artırılması və modernləşdirilməsi üzrə strategiyamız XXI əsrin çağırışlarının öhdəsindən gəlməyə və sürətlə dəyişən geosiyasi şəraitdə milli təhlükəsizliyi təmin etməyə qadir müasir, çevik və qüdrətli Ordunun yaradılmasına yönəlib.
POLİQON: Qazaxıstan Ordusunun arsenalına son illər müasir silah və texnikalar daxil olur. Ordunun silah və hərbi texnika parkının yenilənməsi istiqamətində görülən işlər barədə nələri deyə bilərsiniz?
General-polkovnik Ruslan Jaksılıkov: Bəli, həqiqətən də qoşunların texniki cəhətdən təchiz olunması üçün çox iş görülüb.
Qazaxıstan Silahlı Qüvvələri bəzi silah və hərbi texnika nümunələri alıb. Hazırkı mərhələdə əsas səylər qoşunların keyfiyyət parametrlərinin yüksəldilməsinə, onların müasir silahlar, hərbi texnika və xüsusi vasitələrlə mərhələli şəkildə texniki cəhətdən yenidən təchiz edilməsinə yönəlib.
Perspektivli silahların alınmasına baxmayaraq, Müdafiə Nazirliyi mövcud texnikanın modernləşdirilməsini də unutmur. Bu, dünya praktikasıdır. Müdafiə Nazirliyinin əmri ilə yerli müəssisələr zirehli texnikaları (T-72, BMP-2 və BTR-80 tankları) təmir edir və modernləşdirirlər. Onlar yeniləndikdən sonra artan sürücülük xüsusiyyətləri, daha güclü mühərrik, yeni atəşə nəzarət sistemi və digər üstünlüklər alırlar.
Bir sıra xarici müəssisələrlə də silah və hərbi texnikaya texniki qulluq və təmir işləri aparılıb.
Məsələn, İsrail müdafiə sənaye kompleksi PUA-ların, optik-elektron kəşfiyyat avadanlıqlarının və rabitə vasitələrinin tədarükçüsüdür. Müdafiə Nazirliyi İspaniya istehsalçısından S-295 nəqliyyat təyyarələri, elektron kəşfiyyat və döyüş texnikası alır.
Silahlı Qüvvələrin təchiz edilməsi planlaşdırılarkən əsas səylər aviasiya texnikası, o cümlədən hərbi nəqliyyat, PUA-lar, hava hücumundan müdafiə sistemləri, elektron müharibə, kəşfiyyat, rabitə, kimyəvi müharibə və robot texnikası parkının yenilənməsinə yönəlib.
Kəşfiyyat (o cümlədən radar) tapşırıqlarının yerinə yetirilməsi, tıxacların kəsilməsi və yer hədəflərinə gecə-gündüz dəqiq zərbələrin endirilməsi üçün “Skylark-1LEX” zərbə və kəşfiyyat-taktiki PUA-sı alınıb.
Qoşunların PUA-larla təchiz edilməsi ehtiyaclara uyğun olaraq sistemli şəkildə həyata keçirilir. Yerli müəssisələr PUA-ların istehsalı və texniki xidməti ilə məşğuldur.
Hərbi Dəniz Qüvvələrini təchiz etmək üçün, dalğıcların və xüsusi bölmələrin hazırlanması üçün avadanlıq və sursat alınır, gəmilərin təmiri və texniki xidməti həyata keçirilir.
2025-ci ildən 2030-cu ilə qədər raket gəmisi, təxribat əleyhinə və desant katerləri, döyüş və texniki dəstək gəmilərinin alınması planlaşdırılır. Bundan əlavə, Xəzər dənizinin Qazaxıstan sektorunda yerüstü vəziyyətin monitorinqi üçün üfüqdən kənar müşahidə radiolokasiya stansiyasının alınması nəzərdən keçirilir.
Quru Qoşunları müasir tipli zirehli transportyorlar, “Cobra” və “Arlan” zirehli avtomobilləri, raket və artilleriya, ağır odsaçan sistemlər ilə silahlanıb. Elektron kəşfiyyat və döyüş sistemləri, radiasiya, kimyəvi və bioloji mühafizə vasitələri, mobil rabitə sistemləri, yanacaq-sürtkü materiallarının daşınması üçün avadanlıqlar və səhra xəstəxanaları da alınıb.
Artilleriya bölmələri üçün (Atlas optik-elektron kəşfiyyat avadanlığı, “Skylark-1LEX” PUA, batareyaların atəşə tutulması üçün platforma kəşfiyyat radarı) kəşfiyyat və hədəf təyinetmə avadanlıqları alınır. Bundan əlavə, mövcud atəşi idarəetmə sistemlərinin səmərəliliyinin artırılması məqsədilə onların müasirləşdirilməsi istiqamətində elmi-tədqiqat və təcrübə-konstruktor işləri aparılır, bu işlərdə yerli proqram təminatından və müasir optik-elektron cihazlardan istifadə edilməsi nəzərdə tutulur.
Silahlı Qüvvələrin rabitə vasitələri ilə təmin edilməsi məqsədilə birgə istehsal olunmuş müasir “Tadiran” radiostansiyaları sistemli şəkildə təchiz edilir.
Strateji idarəetmə səviyyəsində radio rabitəsini təşkil etmək üçün yerli müəssisədə istehsal olunan avtomatlaşdırılmış radio rabitə sistemlərindən istifadə olunur ki, bu da Silahlı Qüvvələrin bütün xəbərdarlıq sistemini modernləşdirməyə və döyüş idarəetmə siqnallarının ötürülməsinin etibarlılığını artırmağa imkan verir.
POLİQON: Cənab nazir, Qazaxıstan Ordusunun inventarında yer alan silah və texnikalar arasında son illər xarici satınalmalarla yanaşı yerli müdafiə sənayesinin milli istehsalı olanları da görürük…
General-polkovnik Ruslan Jaksılıkov: Daha əvvəldə qeyd etdiyiniz kimi, ordu quruculuğu və gücləndirilməsi məsələsində ən mühüm məsələ hərbi sənaye kompleksinin dəstəklənməsidir.
Qazaxıstan müstəqillik əldə etdikdən sonra Sovet İttifaqından 50-yə yaxın müdafiə sənayesi müəssisəsini miras aldı. Onlar əsasən Hərbi Dəniz Qüvvələri üçün silahların, tankların, atıcı silahların, raket sistemlərinin və hava hücumundan müdafiə sistemlərinin komponentlərinin istehsalı üzrə ixtisaslaşıblar.
Ölkənin bütün dövlət orqanlarının fəal işi, aydın hərbi-texniki siyasətin qurulması istər hüquq-mühafizə orqanları arasında, istərsə də hərbi və ikili təyinatlı məhsulların yerli istehsalçıları ilə dəqiq nəzarət və qarşılıqlı fəaliyyət şaquli xəttini qurmağa imkan verdi.
Xarici ölkələrlə hərbi-texniki əməkdaşlıq sahəsində düzgün qurulmuş siyasət müdafiə sənayesinin inkişafında böyük rol oynayır. Qazaxıstan ərazisində “NC Kazakhstan Engineering” ASC-nin aparıcı xarici şirkətlərlə birgə müəssisələri fəaliyyət göstərir. Bunlara ASELSAN ilə elektro-optik cihazların birgə istehsalı; “Eurocopter” ilə EC145 helikopterlərinin istehsalı və texniki dəstəyi; “Thales” şirkəti ilə HF və VHF diapazonlarının radio stansiyaları və s. aiddir.
Müstəqillik illərində müdafiə sənayesi orduda tələbat olan məhsulların lokallaşdırılması sahəsində müəyyən uğurlar əldə edib. Bu, ilk növbədə, patron istehsalı, gəmiqayırma, hava hücumundan müdafiə sistemlərinin, optik-elektron sistemlərin, zirehli texnikaların istehsalı və təmiridir. Ancaq əldə edilən nəticələrlə kifayətlənmək olmaz. Texnologiyalar daim təkmilləşir, yeni silah növləri meydana çıxır.
İndi raket silahlarının, lazer, elektromaqnit və digər silahların yerli istehsalının mənimsənilməsi məsələsi aktualdır. Silahlı Qüvvələrimizə hər birindən az miqdarda olmaqla geniş çeşiddə məhsullar lazımdır.
Qazaxıstanın hərbi sənaye kompleksi optik-elektron kəşfiyyat avadanlıqları; zirehli təkərli maşınlar və zirehli personal daşıyıcıları; rabitə və avtomatlaşdırılmış idarəetmə sistemləri; ES-145 helikopterləri və yerdəyişmə qabiliyyəti 200 tona qədər olan döyüş gəmiləri; ağır pulemyotlar və kiçik silah sursatları; hərbi qulluqçular üçün avadanlıq və geyim forması istehsal edir.
Yerli müəssisələrimizdə zirehli texnikanın, nəqliyyat vasitələrinin, eləcə də yaylım atəşli reaktiv sistemlərin texniki xidməti və modernləşdirilməsi həyata keçirilir.
Bu günə qədər, yerli istehsal olan pilotsuz sistemlərdən “BET SKY” şirkətinin istehsalı “BURKİT” və “SUNQAR”; “TAHARQA TECHNOLOGIES” şirkətinin istehsalı “Şağala” və “Şağala-M”; “R&D Center Kazakhstan Engineering” şirkətinin istehsalı “KARAKUS” PUA-larının orduda sınaqları keçirilib. Sınaqların nəticəsi olaraq, Silahlı Qüvvələr tərəfindən “SUNQAR” pilotsuz sistemi silahlanmaya qəbul edilib.
Beləliklə, ordunun silah və hərbi texnika ilə sistemli şəkildə təchiz edilməsi onun döyüş effektivliyini artıracaq.
POLİQON: Qazaxıstanda hərbi təhsil sahəsində idarəetmənin təkmilləşdirilməsi, eləcə də şəxsi heyətin sosial şəraitinin yaxşılaşdırılması istiqamətdə hansı işlər görülür?
General-polkovnik Ruslan Jaksılıkov: Hərbi təhsil sistemi, aşağıdakı təhsil pillələri üzrə Qazaxıstan Respublikası Müdafiə Nazirliyinin tabeliyində olan 9 hərbi təhsil müəssisəsindən ibarətdir:
Qazaxıstan Respublikasının Astana şəhərindəki Milli Müdafiə Universitetində aspirantura (magistratura və doktorantura) təhsili; Almatıdakı Quru Qoşunlarının Hərbi İnstitutunda, Aktobedəki Hava Hücumundan Müdafiə Qoşunlarının Hərbi İnstitutunda, Almatıdakı Radioelektronika və Rabitə Hərbi Mühəndislik İnstitutunda ali təhsil (bakalavr pilləsi); Qazaxıstan Respublikası Müdafiə Nazirliyinin Astana və Şuçinsk şəhərlərindəki Hərbi Kollecində texniki və peşə təhsili; Almatı, Qaraqanda və Çimkent şəhərlərində Jas Ulan respublika məktəblərində orta təhsil.
Qazaxıstan Respublikasının hərbi təhsil və elm sisteminin inkişafı Silahlı Qüvvələrin Ali Baş Komandanı K.K.Tokayevin bütövlükdə ölkənin təhsil və elm sistemi qarşısında qoyduğu yeni vəzifələrlə bağlıdır.
Hərbi təhsil və elm Qazaxıstan Respublikasının ümumi milli təhsil sisteminə üzvi şəkildə uyğun gəlir. Onun gələcək inkişafı siyasəti Qazaxıstan Respublikasının Hərbi Doktrinasına və Qazaxıstan Respublikası Silahlı Qüvvələrinin İnkişaf Strategiyasına (Qazaxıstan Respublikası AF) əsaslanan sinxron dövlət planlaşdırma sistemi şəraitində həyata keçiriləcəkdir.
Hərbi təhsilin və elmin inkişafı siyasətinin həyata keçirilməsi Qazaxıstan Respublikasının ali məktəblərinin İnkişaf Planlarına əsaslanır və yüksək ixtisaslı hərbi kadrların hazırlanması sisteminin daha da müasirləşdirilməsinə, hərbi elmin və innovasiyanın inkişafına, hərbi təhsilin təkmilləşdirilməsinə, elmi və tədris prosesinin hərtərəfli dəstəklənməsinə yönəldilmişdir.
2023-cü ildə 2023-2030-cu illər üçün Qazaxıstan Respublikası Silahlı Qüvvələrinin hərbi təhsili və elminin inkişafı Konsepsiyası hazırlanıb təsdiq edilib.
Məqsəd dövlətin hərbi təşkilatının yüksək ixtisaslı kadrlara olan tələbatına cavab verən optimal, özünü təmin edən hərbi təhsil və elm sistemini yaratmaqdır.
Konsepsiya altı prioritet istiqamətdən ibarətdir, məsələn: hərbi təhsil və elmin idarəetmə sisteminin səmərəliliyinin artırılması; dövlətin hərbi təşkilatının yüksək ixtisaslı və rəqabətədavamlı kadrlarla təmin edilməsi; elmi və innovativ fəaliyyətin inkişafı; təhsil prosesinin tərbiyəvi-ideoloji komponentinin gücləndirilməsi; hərbi təhsil və elm sahəsində beynəlxalq əməkdaşlığın inkişaf etdirilməsi, o cümlədən tədris-maddi bazanın inkişafı və rəqəmsallaşma.
POLİQON: Cari ilin iyul ayının 8-dən 18-dək Qazaxıstanın Aktau şəhərində “Birləşdik-2024” əməliyyat-taktiki komanda-qərargah təlimləri keçiriləcək. Bu təlimlərin əhəmiyyəti nədən ibarətdir?
General-polkovnik Ruslan Jaksılıkov: Qeyd edim ki, biz mütəmadi olaraq ölkəmizin qərbində təlimlər keçiririk. Amma Mərkəzi Asiya regionunda dörd ölkənin (Qazaxıstan, Qırğızıstan, Tacikistan və Özbəkistan) və Azərbaycanın silahlı qüvvələrinin hərbi kontingentlərinin cəlb olunduğu təlimin keçirilməsi üçün belə format ilk dəfədir ki, tətbiq edilir.
Bu addım, ilk növbədə, dövlətimizin mehriban qonşuluq münasibətlərini daha da genişləndirmək və möhkəmləndirmək istəkləri də daxil olmaqla Mərkəzi Asiya regionunda təhlükəsizliyin və sabitliyin təmin edilməsi, habelə hərbi təhlükəsizlik sahəsində qarşılıqlı faydalı əməkdaşlığın qurulması və inkişaf etdirilməsi məsələlərini vurğulayır.
Bütövlükdə bu təlimlər ölkələr arasında qarşılıqlı etimad və maraq səviyyəsini artıracaq, silahlı qüvvələr birgə silahlı mübarizə üsullarını sınaqdan keçirəcək.
Vurğulamaq istərdim ki, Azərbaycan tərəfdən təkcə quru qoşunlarının deyil, həm də dəniz və hava qüvvələrinin bölmələri iştirak edir. Bu, Azərbaycan Silahlı Qüvvələri ilə ilk təlim deyil.
Qeyd edək ki, Qazaxıstanla Azərbaycan arasında qarşılıqlı əlaqələrin tarixi əsrlərə gedib çıxır, lakin müstəqillik illəri keyfiyyətcə yeni xarakter daşıyan xüsusi qarşılıqlı fəaliyyət dövrüdür. Ölkələrimiz arasında münasibətlər həmişə isti və mehriban olub, bir-birinə qarşılıqlı dəstək verib.
Ölkələrimiz arasında sıx qarşılıqlı fəaliyyətə həm də möhtərəm Prezidentimiz ilə Azərbaycan Prezidenti İlham Əliyev arasında formalaşmış etimad və dostluq münasibətləri kömək etmişdir. Bu, ikitərəfli və çoxtərəfli əməkdaşlığın bütün məsələləri üzrə qarşılıqlı anlaşmanın möhkəmlənməsinə kömək edəcək.
POLİQON: “Birləşdik-2024” təlimləri üçün hazırlanan Xüsusi Buraxılışımız vasitəsilə salamlama mesajı olaraq nələri demək istəyirsiniz?
General-polkovnik Ruslan Jaksılıkov: Bu mühüm əməliyyat-taktiki təlimin başlaması ərəfəsində şəxsi heyətimiz qarşısında çıxış etməkdən məmnunam. Bu tədbir Silahlı Qüvvələrimizin yüksək döyüş hazırlığının saxlanılması və müxtəlif ssenarilərdə səmərəli fəaliyyət göstərmə qabiliyyətinin yoxlanılması üçün əsasdır. “Birləşdik-2024” təlimi təkcə praktiki məşq üçün unikal platforma təqdim etmir, həm də birlikdə hərəkət etmək və mühüm əməliyyatları koordinasiya etmək bacarığımızı nümayiş etdirir.
Hər kəsə uğurlu iştirak və ən effektiv qarşılıqlı əlaqə arzulayıram. Qoy hər birimiz ölkəmizi qorumaq və onun təhlükəsizliyini təmin etmək üçün ümumi səylərimizdə faydalı olacaq dəyərli təcrübə və bilik əldə edək.
POLİQON: Mümkünsə bir qədər də “Birləşdik-2024” təlimlərində istifadə olunacaq silah və hərbi texnikalar barəsində danışardıq. Sözügedən təlimlərdə tətbiq olunacaq yeniliklər barəsində oxucularımıza nə deyə bilərsiniz?
General-polkovnik Ruslan Jaksılıkov: Qazaxıstan Respublikası Silahlı Qüvvələrinin nəzarət orqanları, bölmələri və Azərbaycan, Qırğızıstan, Tacikistan və Özbəkistanın hərbi kontingentləri ilə “Birləşdik-2024” əməliyyat-taktiki komanda-qərargah təlimlərinin keçirilməsi ideyası müasir hərbi münaqişələrin təcrübəsi nəzərə alınmaqla hazırlanıb. Birgə təlimin keçirilməsinin bir neçə əsas məqsədi var.
Birincisi, bu, bölmələrin istifadəsi, hərbi heyətin döyüş hazırlığı, bölmələrin səhra, dəniz və hava hazırlığının artırılması sahəsində qabaqcıl təcrübə mübadiləsidir.
İkincisi, birləşmiş qoşunlar qrupunun hərəkətlərini istiqamətləndirməyə imkan verən birgə komanda-nəzarət sisteminin yerləşdirilməsi ilə bağlı məsələlərin işlənib hazırlanması, habelə qərargahlar arasında qarşılıqlı əlaqənin gücləndirilməsi və əməliyyat-taktiki fonda birgə hərəkətlərin planlaşdırılmasıdır.
Üçüncüsü, iştirakçı ölkələrin bölmələrinin döyüş potensialından maksimum istifadə etməyə imkan verən sıx qarşılıqlı əlaqə, bir-birini qarşılıqlı tamamlayan şəraitdə döyüş hazırlığı tapşırıqlarının birgə yerinə yetirilməsidir.
Qazaxıstan Respublikasının Müdafiə naziri, general-polkovnik Ruslan Jaksılıkova müsahibəyə görə təşəkkür edirik.
Müsahibə “Poliqon” hərbi-kosmik texnoloji jurnalının iyul-avqust 2024-cü il tarixli 4 (72) sayında yayımlanıb.
Zaur Babaşov
