Aydın Xanı ən azı 25 ildi tanıyıram. İndi olduğu kimi o vaxt da fəal idi. Hansı tədbirə gedirdimsə, birinci onu görürdüm. Hamıdan əvvəl gəlib hamıdan sonra gedirdi...
Sözsüz ki, Aydın Xan ölkədə azsaylı yenilikçilərdəndir. İntellektual səviyyəsi yüksəkdir, daim öz üzərində işləyir. Təkcə öz üzərində işləməklə yetinmir, həm də başqalarının intellektual səviyyəsini artırmağın qeydinə qalır. Elektron kitabxana layihəsi Aydının Azərbaycan oxucusuna ən böyük töhfəsidir. Biz dəyər verməsək də, gələcək nəsillər onun bu yaxşılığını unutmayacaq.
Aydın Xan həm də Azərbaycan televiziyalarının vazkeçilməz ekspertlərindən biridir. Çünki həmişə deməyə sözü var. "Yuxarıda bığ, aşağıda saqqal var" deyib nala-mıxa vurmur. Düşündüyünü deməkdən çəkinmir, həmişə hadisələrə fərqli baxışı ilə seçilir. Əminliklə deyirəm, Aydın öz xoşbəxtliyini cəmiyyətin xoşbəxtliyində axtaran adamlardandır. vakansiyalar
Təxminən 10-12 il əvvəl Aydınla birlikdə "Lider" televiziyasının səhər proqramında qonaq olmuşduq. Bizə yarım saat vaxt ayırmışdılar. Hər ikimizin danışmağa meylli olduğumuzu bildikləri üçün efirdən əvvəl bunu şəxsən diqqətimizə çatdırmışdılar.
Aradan xeyli vaxt keçib, hansı mövzunu müzakirə etdiyimiz dəqiq yadımda deyil. Amma xatırlayıram ki, mən mentaliteti, milli-mənəvi dəyərləri müdafiə edirdim, Aydın isə yenilik tərəfdarı kimi çıxış edirdi. Maraqlı müzakirə gedirdi. Veriliş başa çatandan sonra bildik ki, rəhbərlik də proqramını izləyirmiş. Söhbət xoşlarına gəldiyi üçün biz efirdə olanda 30 dəqiqənin üstünə 40 dəqiqə də əlavə ediblər...
Aradan 10-12 il keçib, amma Aydın heç dəyişməyib. Yenə sözü üzə deyir, yenə çoxumuzun deməyə cəsarət etmədiklərini deyir. Hətta bəzən deyilməli olmayan sözləri də deyir.
Bu gün olduğu kimi...
Aydın Xan "Yeni Sabah"a açıqlama verib. Kifayət qədər aktual problemlərdən danışıb, gənc xanımların təbii yolla ana olmaq istəməməsini tənqid edib, diqqəti ana südü ilə bəslənməyən uşaqların gələcəkdə üzləşəcəyi problemlərə yönəldib. Arada səmimiyyətin kulminasiya nöqtəsinə çatıb. Əmin olmadığı, bilmədiyi məsələlərdən danışıb. Görün nə deyib: "Anam 8 övladı iynəsiz-kənar müdaxiləsiz doğdu, heç biri ölüb eləmədi, hələ abort etdiklərini demirəm..."
Aydının məlum açıqlamada qaldırdığı problem qalıb kənarda, indi hamı onun anasından danışır.
Bir anası qalmışdı, onu da müzakirəyə çıxardı...
Dostum, biz o qədər intellektual cəmiyyət deyilik ki, məsələnin mahiyyətini öyrənib sonra danışaq. Biz əvvəl danışırıq, sonra nə baş verdiyini aydınlaşdırmağa çalışırıq.
Əvvəllər Sartrdan, Folknerdən, Drayzerdən sitat gətirirdin, son vaxtlar bütün misalları anandan çəkirsən. Dəyişiklik yaxşıdır, amma həmişə faydalı deyil.
Ara yerdə ananı bada verirsən...
Seymur VERDİZADƏ
Telegram kanalımız
