Anti-İnhisar və İstehlak Bazarına Nəzarət Dövlət Xidməti ilə Əmək və Əhalinin Sosial Müdafiəsi Nazirliyi arasında çəkişmə davam edir. Tribunainfo.az xəbər verir ki, sentyabrın əvvəlində nazirliyin 10-a yaxın tenderinin nəticələrini ləğv edən Dövlət Xidməti dünən daha bir qərarını açıqlayıb.
Həmin qərara əsasən ƏƏSMN-in elan etdiyi 5 tenderin nəticəsi bir gündə ləğv olunub.
Rəsmi qaynaqlarda qeyd edilir ki, ləğv edilmiş müsabiqələrin hamısı ƏƏSMN-in balansında olan Dövlət Tibbi-Sosial Ekspertiza və Reablitasiya Agentliyinə məxsus olub.
Belə ki, TSERA 29+1 və 33+1 yerlik sərnişindaşıma avtomobillərinin satınalınmasını istəyib. 890.487 dəyərində olan tenderin ləğvi Nəzarətedici orqanın qanunun tələblərinə riayət etməməsi olub.
Ləğv edilən ikinci tender isə müəssisələrdə yanğın siqnalizasiya sistemlərinin sınaq olunması və texniki xidmət göstərilməsi ilə bağlı olub. 9.301 manatlıq satınalmaya səbəb yenə qanunların pozulması göstərilib.
TSERA-nın ləğv edilən üçüncü tenderi qazanxana detektorlarının və yanğınsöndürmə balonlarının satınalınmasını əhatə edib.
4.915,73 manatlıq müsabiqəyə qadağa qoyulması digərlərindən fərqlənməyib.
ƏƏSMN-in balansındakı agentlik həmçinin kondisionerlərin texniki xidmətlərinin satınalınması prosesini də reallaşdıra bilməyib. AİİBNX 128.576,34 manatlıq satınalmada gizli sövdələşmə və qiymətlərin şişirdilməsini müəyyən edərək, nəticələri ləğv edib.
TSERA bundan əlavə Yevlax Reabilitasiya Mərkəzi üçün nəzərdə tutulan qaz sayğacının dəyişdirilməsi və qazlaşdırma işlərinə dair tenderdə də məhrum olub. 26.777 manatlıq satınalma müqaviləsinin şərtlərə cavab vermədiyi müəyyən olunub.
Xatırladaq ki, AİİBNX son bir ayda ƏƏSMN-in 30-a yaxın tenderinin nəticələrini ləğv edib.
