Marshall Monitor III ANC naqilsiz qulaqlığı təqdim edilib - QİYMƏTİ

     Böyük Britaniyanın Marshall şirkəti öz yeni naqilsiz qulaqlığını təqdim edib. Şirkətin yeni naqilsiz qulaqlığı Marshall Monitor III ANC adlanır. Bu yeni naqilsiz qulaqlıq 4 il bundan öncə təqdim edilmiş Marshall Monitor II ANC modelinin daha təkmilləşdirilmiş versiyasıdır. Marshall Monitor III ANC-nin əsas fərqləndirici üstünlüyü ondan ibarətdir ki, o, bir dəfə şarj olunandan sonra 100 saata kimi çalışa bilir. Yeni naqilsiz qulaqlıq qatlana bilən konstruksiyaya sahibdir. Bu isə onun daşınmasını daha rahat edir. Qulaqlıq 32 mm-lik audio drayver ilə təchiz olunub və üstəlik həcmli səslənmə özəlliyini dəstəkləyir.     Qulaqlıqda reallaşdırılmış Adaptive Loudness funksiyası səs balansını avtomatik şəkildə ətraf mühitə uyğunlaşdıra bilir. Marshall Monitor III ANC ətraf səs-küyün aktiv boğulması (ANC) funksiyasını dəstəkləyir. Bu funksiya sayəsində qulaqlıq ətraf səs-küyü 117 dB-ə (desibel) kimi boğa bilir. Müxtəlif cihazlara qoşulmaq üçün isə qulaqlıqda Bluetooth 5.3-ün dəstəyi reallaşdırılıb. ANC funksiyasının deaktiv olduğu halda qulaqlıq 100 saat ərzində, ANC funksiyasının aktiv olduğu halda isə 70 saat ərzində çalışa bilir. Qulaqlığın tam enerji yığması üçün 2.5 saat lazımdır. Marshall Monitor III ANC artıq satışa çıxıb və onun qiyməti 350$ təşkil edir.