Orta büdcəli Pixel 9a-nın render fotoları təqdim edilib

     Google şirkəti avqust ayında Pixel 9 smartfon seriyasını təqdim etdi. Bu seriyaya Pixel 9, Pixel 9 Pro, Pixel 9 Pro XL və qatlana bilən Pixel 9 Pro Fold modelləri daxil oldular. İndi isə şirkət Pixel 9a adlı büdcəli model üzərində çalışır. İnternetdə artıq Pixel 9a modelinin render fotoları ortaya çıxıb. Render fotolar OnLeaks ləqəbli məşhur insayder ilə Android Headlines tərəfindən təqdim edilib. Render fotolara əsasən Google şirkəti Pixel 9a-da ənənəvi kamera sahəsi dizaynından imtina edə bilər.     Render fotolardan da göründüyü kimi Pixel 9a smartfonu iki ədəd arxa kamera ilə təchiz olunacaq və həmin kameralar gövdə ilə eyni səviyyədə oval formalı sahə daxilində yerləşəcəklər. Yəni kamera sahəsi gövdədən hündür yerləşməyəcək. Ümumi görünüş baxımından Pixel 9a modeli adi Pixel 9-a bənzəyir. Pixel 9a da yastı gövdə və ekran dizaynını əldə edəcək. Bununla yanaşı smartfonun ekran ətrafı çərçivələri Pixel 9-dakı kimi nazik olmayacaqlar. Gözləntilərə əsasən Pixel 9a smartfonu Tensor G4 prosessoru vasitəsilə çalışacaq və qutudan Android 15-i əldə edəcək. Çox güman ki, Pixel 9a smartfonu gələn ilin may ayında baş tutacaq Google I/O 2025 konfransı çərçivəsində təqdim ediləcək.

• Google
• Render Fotoları
• Pixel 9
• Pixel 9A