Türkmənistan BMT-nin ekoloji konvensiyalarının fəal tərəfdarı olmaqla bərpa olunan enerji mənbələrinin inkişafı istiqamətində inamlı addımlar atır.
Hafta.az-ın yazdığına görə, “Türkmənistan: Qızıl əsr” adlı hesabatda olduğu kimi, bu gün ölkədə müasir və innovativ texnologiyalardan istifadəyə yönəlmiş hərtərəfli islahatlar fəal şəkildə aparılır. Bərpa olunan enerji mənbələri sahəsində yeniliklər praktikaya tətbiq edilir. Son vaxtlara qədər ölkədə mərkəzi həyat təminatı şəbəkələrindən uzaqda yerləşən yerli istifadəçilər üçün elektrik enerjisi və minerallaşdırılmış suyun duzsuzlaşdırılmasını təmin edən kiçik günəş panelləri qurğularından istifadə edilirdi. Hazırda vəziyyət kəskin şəkildə dəyişir.
Belə ki, Balkan vilayətinin Qızıllarvat ərazisində ümumi gücü 10 MVt olan günəş və külək kombinə edilmiş elektrik stansiyası tikilir. Sənaye ekspertlərinin qeyd etdiyi kimi, belə stansiyalardan və yerli bərpa olunan enerji mənbələrindən, xüsusən küləkdən istifadə qalıq yanacaq istehlakını azaldacaq.
Təbii ehtiyatlardan və ətraf mühitdən səmərəli istifadəyə dövlət nəzarəti haqqında müddəanı təsbit edən Türkmənistan Konstitusiyasına uyğun olaraq, qanunvericilik daim təkmilləşdirilir. İqlim Dəyişikliyi üzrə Milli Strategiya, 2030-cu ilə qədər Bərpa Olunan Enerjinin İnkişafına dair Milli Strategiya, Türkmənistanın “Bərpa olunan enerji mənbələri haqqında” və “Enerjiyə qənaət və enerji səmərəliliyi haqqında” qanunları qəbul edilib. Bundan əlavə, Türkmənistan Vyana Konvensiyasını və Ozon qatını məhv edən maddələrlə bağlı Monreal Protokolunu ratifikasiya edib. “Yaşıl” iqtisadiyyat çərçivəsində perspektiv vektorlar arasında hidrogen istehsalı layihələrinin həyata keçirilməsi nəzərdə tutulur.
Türkmənistanın energetika naziri Annagəldi Saparovun bu yaxınlarda keçirilən “Türkmənistanın neft və qazı - 2024” forumunda qeyd etdiyi kimi, 10 meqavat gücündə günəş və külək elektrik stansiyasının istifadəyə verilməsi alternativ enerjinin praktiki tətbiqinin başlanğıcını simvollaşdırır. Mənbə qeyd edir ki, zaman keçdikcə elektrik enerjisi ixracını artırmağa imkan verəcək Xəzər dənizinin sahilində perspektivli kombinə edilmiş elektrik stansiyası layihəsi də qeyd olunub.
