Mark Lonqo adlı bir kişi tərəfindən yeddi il əvvəl himayəyə götürülmüş vəhşi dələ Nyu York hakimiyyəti tərəfindən müsadirə olunub.
Valyuta.az The Guardian-a istinadla xəbər verir ki, söhbət Pinat adlı İnstaqram ulduzundan gedir.
Bu, ətraf mühit xidmətinin əməkdaşlarının "vəhşi heyvanların potensial təhlükəli şəkildə saxlanması" ilə bağlı məlumatlar almasından sonra baş verib. Həmçinin Fred adlı bir yenot da müsadirə edilib.
Lonqonun sözlərinə görə, çoxsaylı anonim şikayətlər onun evinə Nyu York Dövlət Ətraf Mühitin Mühafizəsi Departamentindən (DEC) altı əməkdaşın gəlməsinə səbəb olub.
"Mənimlə elə rəftar etdilər, sanki narkotacirəm və onlar narkotik və silah axtarırlar", – deyə Lonqo şikayətlənib. O, Pinatın geri qaytarılması üçün təxminən 20 000 imza topladığını və bir qrup vəkil tutduğunu bildirib.
DEC nümayəndəsi, "vəhşi heyvanların potensial olaraq təhlükəli şəkildə saxlanılması, onların quduzluq daşıya biləcəyi və vəhşi heyvanların ev heyvanı kimi qanunsuz saxlanılması" ilə bağlı ictimaiyyətdən çoxsaylı məlumatlar aldıqdan sonra araşdırmaya başladıqlarını deyib.
Heyvanlar üçün P'Nuts Freedom Farm Animal Sanctuary adlı sığınacaq idarə edən Lonqo, Pinatın itirilməsi ilə bağlı İnstaqramda bir vida yazısı paylaşıb və dələnin yuxuya veriləcəyindən narahat olduğunu bildirib. "Pinatın sağ olub-olmadığını bilmirəm", – deyə o söyləyib.
O əlavə edib ki, onu sığınacaq qurmağa məhz Pinat ruhlandırıb. Lonqo bildirib ki, Pinat vəhşi təbiətdə yaşamaq bacarığına malik deyil və bu səbəbdən onun ev heyvanı kimi qalıb. Lonqo internet məşhurluğunu Pinatın bir pişiklə oynadığı videonu paylaşdıqdan sonra qazanıb. Daha sonra dələ Lonqonun çiynində kovboy papağı və digər aksessuarlarla pozalar verib.
Yenota gəlincə, onun reabilitasiyadan sonra təbiətə buraxılması planlaşdırılır.
Nicat
