“Barselona”nın braziliyalı cinah hücumçusu Rafinya “Real”dakı həmkarı və milli komanda yoldaşı Vinisius Juniordan söhbət açıb.
Arena.az məlumat verir ki, Rafinya Vinisius Juniorun irqçiliyə dair mübarizəyə münasibəti haqda danışıb:
“Vinisiusun irqçi şüarlara görə pərişan olduğunu başa düşürəm. Bu qəbildən məqamlar insanları əndazəsindən çıxarır. “Vini” həmişə şəndir, həmişə zarafatlaşır. Ancaq onu ciddi olmağa vadar edən yeganə mövzu irqçilikdir. Mən “Vini”ni başa düşürəm”, deyə Rafinya vurğulayıb.
Xatırladaq ki, ki, Vinisius Junior mütəmadi olaraq müxalif azarkeşlər tərəfindən irqi zəmində təhqirlərə məruz qalır. Braziliyalı futbolçu İspaniyada daha qabarıq təzahür edən, insanlığa yaraşmayan bu halla mübarizədə ən aparıcı futbolçudur. Vinisius mütəmadi olaraq bu mövzuda tədbirlər təşkil edir, özü nitqlə çıxış edərək, insanları maarifləndirməyə çalışır. “Vini”nin bu istiqamətdə fəaliyyət göstərən, bir çox nüfuzlu ictimai institutlarla sıx əməkdaşlıq edən layihəsi var.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 15 oyuna çıxıb, 8 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 279 oyun, 91 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
