Belarus Universal Əmtəə Birjasında (BUƏB) Azərbaycana ət məhsullarının ixracı üzrə ilk əqdlər qeydə alınıb və iki əqd üzrə ümumi alış həcmi 18 ton təşkil edib.
Marketlərdə ət və ət məhsulları neçəyədir? – MARKETLƏR, QİYMƏTLƏR, SİYAHI (Oktyabr, 2024)
FED.az xəbər verir ki, bu barədə BELTA -ya BUƏB-in mətbuat xidməti məlumat verib.
Satıcı qismində Brest vilayətinin aparıcı ət emalı müəssisələrindən biri, alıcı qismində isə qida sənayesi üçün ət və ət məhsullarının idxalı üzrə ixtisaslaşmış Azərbaycan ticarət təşkilatı çıxış edib.
BUƏB-in məlumatına görə, əvvəllər Azərbaycan iştirakçıları əsasən taxta-şalban və süd məhsulları alırdılar, hazırda isə ət və ət məhsulları seqmentində əmtəə nomenklaturasının genişləndirilməsi Belarus və Azərbaycan arasında birja ticarətinin inkişafı üçün yeni imkanlar açır.
Beləliklə Azərbaycan Rusiya və Çindən sonra Belarus ilə birja dövriyyəsi həcminə görə üçüncü yeri tutur. Bu ilin 10 ayı ərzində bu ölkənin şirkətləri 91 milyon ABŞ dollarından çox birja əməliyyatları həyata keçiriblər. Bu da ötən ilin yanvar-oktyabr ayları ilə müqayisədə 2,5 dəfə çoxdur. Üstəlik, bunların hamısı Belarus mallarının ixracı olub - əsasən ağac emalı sənayesi məhsulları, hansı ki, bu, tədarüklərin 90 %-ni təşkil edib.
"Birja satışlarının artması ilk növbədə Azərbaycandan olan daimi alıcıların dairəsinin genişlənməsi ilə bağlıdır. Azərbaycan biznesinin birjaya gəlməsinə ölkələrimiz arasında möhkəm ticari-iqtisadi əlaqələr, dil baryerinin olmaması və s. kömək edir", - mətbuat xidmətindən bildiriblər.
Qeyd edək ki, "Belarus Universal Əmtəə Birjası" ASC 2004-cü ildə yaradılıb. Bazarda ilk ticarət 2005-ci ilin iyun ayında baş tutub.
Bu il noyabrın 1-nə olan vəziyyətə görə BUƏB-də 132 Azərbaycan rezidenti akkreditə olunub. Beləliklə, ilin əvvəlindən Azərbaycandan ticarət əməliyyatlarında iştirak edən şirkətlərin sayı 41-ə çatıb. (Report)
