Bakıda velosiped kirayəsi xidmətinin tətbiqinə bu ilin 24 avqust tarixindən başlanılıb.
Bunu Azərbaycan Yerüstü Nəqliyyat Agentliyinin təşkil etdiyi ictimai dinləmədə qurumun mikromobillik şöbəsinin müdiri Coşqun Məmmədov deyib.
O bildirib ki, indiyə qədər kirayə edilmiş velosipedlərlə 140 min kilometrə yaxın sürüş olub:
"Bu vaxta qədər 2056 velosiped kirayəyə götürülüb. Velosiped kirayəsi üçün gündəlik 650 sifariş olur. Gündəlik müraciət edən sürücü sayı 300-305 şəxs olur. Velosipedlərin kirayəsi üçün bu vaxta qədər 30128 qeydiyyat olub".
Bəs velosipedlərlə bağlı vəziyyət nə yerdədir? İnsanlar düzgün şəkildə istifadə edə bilirlərmi?
Sualımızı cavablandıran Avtosfer.az saytının baş redaktoru, nəqliyyat eksperti Elməddin Muradlı "Sherg.az”a bildirib ki, velosipedlərlə bağlı vəziyyət heç də yaxşı deyil:
“İnsanlar velosipedi ya icarəyə götürür, ya da özlərinin şəxsi velosipedi ilə ciddi qayda pozuntusu törədirlər. Bu bizi narahat edir. İstəməzdim ki, ortaya bu cür mənzərə çıxsın. Təəssüf ki, belə hallar yaşanmaqdadır. Ümumi problemin qabarıq şəkildə görünməsinin səbəbi var. Çünki onların böyük əksəriyyətinin yol hərəkəti qaydalarından anlayışı yoxdur. Bəziləri fikirləşir ki, velosiped sürürsə, hər şey olar. Yəni velosipedə məsuliyyət yoxdur kimi düşüncələri var. Ancaq nəzərə almaq lazımdır ki, velosipedçinin də, skuter sürənində, yoldan mal qara keçirənində, motosiklet sürənində, piyadanın və digər sürücülərin də müəyyən edilmiş qaydada məsuliyyəti var. Bu məsuliyyəti hər kəs dərk etməli və ona uyğun hərəkət etməlidir. Velosipedlər səkilərdə hərəkət edir və insanları ciddi şəkildə narahat edirlər. Ümid edirəm ki, problemlərin həlli üçün nəzarət tədbirləri gücləndiriləcək. Çünki nəzarət olmayanda bu cür mənzərə ortaya çıxır. Lakin biz belə hal istəmirik. Velosipedlərlə bağlı stimullaşdırıcı addımlar atıldı, onlar üçün zolaqlar çəkildi. Ancaq belə vəziyyətin ortaya çıxması yaxşı hal vəd etmir. Bu şəkildə velosiped sürənləri qəbul edə bilmərik. Həm də burada ölüm riski var. Bu il əvvəlki il ilə müqayisədə velosipedlə qəzaya düşən və ölən insanların sayı artıb”.
