Vaşinqton və 20-dən çox ştat seçki rəsmilərini və hökumət binalarını prezident seçkilərindən sonra Donald Tramp tərəfdarlarının potensial etirazlarından və zorakı iğtişaşlardan qorumaq üçün ordunu cəlb edir.
Bu barədə Qaynarinfo AP və "Reuters”ə istinadən xəbər verir.
20-dən çox ştat Vaşinqtondan seçkidən sonrakı həftələrdə və andiçmə mərasiminə qədər ehtiyac yaranarsa və tələb olunarsa, Milli Qvardiya qoşunlarını göndərməyi xahiş edib.
Kolumbiya dairəsi hələ də qvardiya qoşunlarının yerləşdirilməsi ilə bağlı rəsmi müraciət etməyib. Lakin rəsmilər Konqresdə yanvarın 6-da seçkilərin nəticələrinin təsdiqlənməsi və ondan iki həftə sonra keçirilən andiçmə mərasimi ətrafında Kapitolidə zorakılıqların yenidən baş verməsi ehtimalını müzakirə edir və buna hazırlaşır.
Bazar ertəsi, noyabrın 4-də jurnalistlərə danışan Milli Qvardiya Bürosunun gələcək əməliyyatlar rəisi Jan-Pol Loranso bildirib ki, bu il nə qədər qvardiyaçıya ehtiyac duyulacağı hələ aydın deyil.
O, bunun Kolumbiya dairəsinin nə istədiyindən asılı olacağını söyləyib, lakin qeyd edib ki, Milli Qvardiya Bürosu və ştatlar yardım üçün müraciətləri gözləyir.
Xatırladaq ki, bu gün, noyabrın 5-də ABŞ-da növbəti prezident seçkiləri keçirilir. Yarışda əsas namizədlər Demokratlar partiyasından Kamala Harris və Respublikaçılar partiyasından Donald Trampdır.
Nizami Bağırov
