"Volkswagen" hazırda Alman avtomobil sənayesində ciddi böhranla üz-üzədir.
Volkswagen pandemiyadan bəri ən aşağı mənfəət marjası açıqladı
FED.az xəbər verir ki, şirkət yüksək işçi xərcləri və zəif məhsuldarlıqla Çinlə rəqabət aparmaqda çətinlik çəkir. Keçən il 9,4 milyon avtomobil satmasına baxmayaraq, "Toyota"ya nisbətən iki dəfə çox işçi tələb etdi. Qeyd edək ki, istehsal prosesinə “Volkswagen” 684 min, yapon istehsalçısı isə cəmi 375 min işçini cəlb edib, bu da Almaniyanın istehsal modelinin səmərəsizliyini göstərir.
Bu böhran yalnız "Volkswagen"i deyil, Almaniyanın iqtisadiyyatını da təhdid edir. Avtomobil sənayesi ölkənin ÜDM-nin 5%-ni təşkil edir və təxminən 800,000 nəfəri işlə təmin edir. Lakin Çinlə artan rəqabət və yüksək xərclər Almaniyanın ənənəvi üstünlüklərini zəiflədir.
Almaniyanın iqtisadi rəqabətliliyini qorumaq üçün ciddi dəyişikliklərə ehtiyac var. Yüksək enerji qiymətləri, vergilər və yaşlanan əhali Almaniyanın istehsal gücünə mənfi təsir göstərir. Məruzələr göstərir ki, 2030-cu ilə qədər €1,4 trilyonluq investisiya olmadan Almaniya iqtisadiyyatı ciddi təzyiq altında qalacaq.
