Azərbaycan Mərkəzi Bankı (AMB) məsafədən kreditləşmənin üstün və çatışmaz tərəflərini açıqlayıb.
AMB-nin “Far.Az”un sorğusuna cavabında bildirilib ki, məsafədən kreditləşmənin üstünlüklərinə sürətli və rahat əlçatanlıq, vaxt qənaəti və kreditin rəqəmsal kanallar vasitəsilə fiziki banka getmədən əldə olunması imkanları daxildir. Bu metod müştərilərə müxtəlif kredit təkliflərini müqayisə etmək imkanı da verir.
"Bununla yanaşı, məsafədən kreditləşmənin bəzi çatışmazlıqları da mövcuddur. Əsasən müştərinin kimliyinin düzgün eyniləşdirilməməsi və məlumat təhlükəsizliyində mümkün boşluqlar risk yarada bilər. Həmçinin məsafədən kredit alma prosesində müştəriyə daha az dəstək göstərilə bilər ki, bu da məlumatın düzgün anlaşılmasını çətinləşdirə bilər.
“Bank olmayan kredit təşkilatları haqqında” qanununa edilən dəyişikliklə bağlı hazırlanmış və qüvvəyə minmiş yeni qaydalar kredit risklərinin idarə edilməsi prosesinə dair tələbləri müəyyən edir. Qaydalarda kredit risklərinin qiymətləndirilməsi və inzibatçılığı ilə bağlı minimum tələblər göstərilib, bu da bank olmayan kredit təşkilatlarında (BOKT) risklərin düzgün idarə olunmasını təmin etməyə yönəlib.
Layihədə istehlak kredit müqaviləsinin məsafədən bağlanması zamanı risklərin qarşısını almaq üçün “Cinayət yolu ilə əldə edilmiş əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında” qanunundan və bu qanuna uyğun olaraq hazırlanmış müştəri verifikasiyası qaydalarından istifadə nəzərdə tutulur.
AMB-nin İdarə Heyətinin 2022-ci il 4 fevral tarixli Qərarı ilə təsdiq olunmuş “Bank hesablarının açılması, aparılması və bağlanması Qaydası”na əsasən məsafədən bank hesablarının açılmasına dair tələblər müəyyən edilib. Hazırkı təcrübə BOKT-larda kredit risklərinin idarə edilməsi qaydasının hazırlanması zamanı istifadə olunacaq.
Bu tənzimləmə prosesinin həyata keçirilməsi bank olmayan kredit təşkilatlarında məsafədən kreditləşmə zamanı müştərilərin identifikasiyasının düzgün aparılmasına və potensial risklərin qarşısının alınmasına kömək edəcək", - AMB qeyd edir.
Bildirilib ki, Mərkəzi Bankın “2024-2026 Maliyyə Sektorunun İnkişafı Strategiyası” çərçivəsində rəqəmsal maliyyə təşəbbüsləri arasında müştərilərin rəqəmsal kanallarla eyniləşdirilməsinin təkmilləşdirilməsi də nəzərdə tutulub. Bu çərçivədə məsafədən hesabların və müqavilələrin bağlanılması üçün istifadə olunan eyniləşdirmə və imzalama üsulları yenilənəcək. Bank olmayan kredit təşkilatları bu qaydaların tələblərinə əsasən istehlak kreditlərinin rəqəmsal proseslərini inkişaf etdirə biləcəklər, AMB vurğulayıb.
