Çempionlar Liqasının 4-cü turunun “Liverpul” – “Bayer” oyunu ərəfəsində komandaların baş məşqçiləri bir-birini qiymətləndiriblər.
Arena.az xatırladır ki, “Liverpul” – “Bayer” oyunu bu gün, noyabrın 5-də baş tutacaq.
“Liverpul”un baş məşqçisi, niderlandlı mütəxəssis Arne Slot “əczaçılar”ı çalışdıran ispan həmkarı Xabi Alonsonu qiymətləndirib:
“Onu inanılmaz məşqçi edənin nə olduğunu demək çətindir, amma görünür ki, o, belədir.
Xabi “Bayer”ə gələndə klub yarış cədvəlinin aşağı hissəsində idi, yeni oyunçulara isə çox pul xərcləmədilər və yalnız Avropa Liqasının finalında məğlub oldular. Onu nəyin xüsusi etdiyini demək çətindir, çünki onunla qarşılaşmamışam və işləməmişəm, amma bu, onun bəlkə də keçmişdə ən yaxşı məşqçilərlə işlədiyi və ən yüksək səviyyədə oynadığı üçündür. Buna görə də o, oyunçuların müəyyən məqamlarda nəyi necə hiss etdiyini bilir və anlayır”, – ESPN şəbəkəsi Slotdan sitat gətirir.
Həmçinin Xabi Alonso niderlandlı həmkarını qiymətləndirib:
“Slotun yanaşması “Liverpul”un nəbzinə müvafiqdir. Arne ilk üç ayda yaxşı iş görüb, “qırmızılar” isə Premyer Liqa və Çempionlar Liqasına başçılıq edilər. Bizim öz oyun planımız var, onun necə işlədiyini görəcəyik”, – “Liverpool Echo” dərgisi Alonsodan sitat gətirir.
“Liverpul” – “Bayer” oyunu Bakı vaxtı ilə saat 00:00-da (6 noyabr) başlayacaq.
