Bakıda “KredAqro” Bank Olmayan Kredit Təşkilatına qarşı dələduzluq etmiş şəxsin məhkəməsi başa çatıb.
“Qafqazinfo”nun məlumatına görə, Səbail Rayon Məhkəməsi saxta vəsiqə ilə “KredAqro”dan 5 min manat kredit götürən Anar Abdullayevin (ad-soyad şərtidir) azadlığını 2 il 6 ay müddətinə məhdudlaşdırılıb.
Hadisəyə gəlincə, 32 yaşlı Anar özünə və ona zamin duran dostlarına Dövlət Sərhəd Xidmətinin N saylı hərbi hissəsinə aid saxta vəsiqə və kredit təşkilatına təqdim etmək üçün saxta bank rekvizitləri hazırlayıb.
Maraqlıdır ki, “KredAqro”nun kredit mütəxəssisləri bu saxtakarlığın fərqində olmayıblar. Belə ki, qurum əməkdaşları kredit ödənişi üçün Anara zəng edəndə, o, növbəti tarixlərdə ödəniş edəcəyini bildirsə də, sonradan zənglərə cavab verməyib.
Onun əslində, DSX-də yox, Yevlaxda traktorçu işlədiyini isə BOKT-dan kredit götürərkən nömrəsini verdiyi qohumu deyib. Bundan sonra dələduzluğa məruz qaldığını bilən “KredAqro” hüquq-mühafizə orqanlarına müraciət edib.
Emin Səfərov
