"Mən müharibələrə başlamaq deyil, onları dayandırmaq niyyətindəyəm".
Bakupost.az xarici KİV-ə istinadən xəbər verir ki, bunu ABŞ-nin yeni seçilmiş prezidenti Donald Tramp Palm-Biçdəki iqamətgahında tərəfdarları qarşısında çıxış edərkən bildirib.
“Dörd il ərzində (2017-ci ildən 2021-ci ilə qədər prezident kimi ilk səlahiyyət müddətində) İŞİD-i məğlub etməyimizdən başqa heç bir müharibə olmadı. Biz onu rekord müddətdə darmadağın etdik. Lakin heç bir müharibə aparmadıq. Mən müharibələrə başlamaq fikrində deyiləm, onları dayandıracağam”, - deyə Tramp bildirib.
O qeyd edib ki, Birləşmiş Ştatların güclü və qüdrətli ordusu var, lakin “idealda” ondan istifadə etməyə ehtiyac yoxdur.
Prezidentlik yarışı zamanı Tramp dəfələrlə bəyan edib ki, qalib gəlsə, 2025-ci il yanvarın 20-də rəsmi səlahiyyətlərinin icrasına başlamazdan əvvəl Ukraynada müharibəni dayandıracaq. O, həmçinin İsrailə hərtərəfli dəstəyi davam etdirəcəyinə və Yaxın Şərqdə münaqişənin dayandırılmasına nail olacağına söz verib.
Zaur, BakuPost
