Avropa İttifaqı Nümayəndəliyi “Bizi birləşdirən su” adlı fotosərgi keçirir.
Bu barədə Bakıvaxtı.az-ya Aİ Nümayəndəliyindən məlumat verilib.
Məlumata görə, Avropa İttifaqının Azərbaycandakı Nümayəndəliyi Avropa İttifaqına üzv dövlətlərin səfirlikləri ilə birgə beşinci “FantazEU” Mədəni İrs Festivalı çərçivəsində “Bizi birləşdirən su” fotosərgisini təşkil edəcək. Sərginin mövzusu Azərbaycanın qısa zamanda ev sahibliyi edəcəyi ən böyük COP29 konfransı üçün irəli sürdüyü təşəbbüslərdən birini əks etdirir.
Avstriya, Belçika, Xorvatiya, Çexiya, Fransa, Macarıstan, Latviya, Litva, Hollandiya, Polşa, Rumıniya, Slovakiya və İsveç səfirlikləri çay və şəlalələr kimi təbiətdə suyun füsunkar şəkillərini, eləcə də Avropa şəhərlərini gözəlləşdirən heyrətamiz fəvvarələrin fotolarını təqdim ediblər.
“Bu, incəsənət və ekologiyanı birləşdirən unikal bir sərgidir. Biz, Aİ-na Üzv Dövlətlərdən alınan valehedici su fotoları vasitəsilə su ehtiyatlarının həyatın hərəkətverici qüvvəsi kimi əhəmiyyətli rol oynadığını göstərmək istəyirik. Su insanlar və təbiət, həmçinin iqlimi tənzimləmək baxımından vacib resursdur. Bu, iqtisadiyyat, kənd təsərrüfatı və enerji hasilatı baxımından da çox vacibdir. Bu cür sərginin təşkil edilməsi ilə Bakıda COP29 ərəfəsində suyun oynadığı rol və onun qorunmasına olan ehtiyac bir daha vurğulanır”, - deyə Aİ-nin səfiri Peter Michalko bildirib.
“Bizi birləşdirən su” fotosərgisi 7-10 noyabr tarixlərində Nizami küçəsi, 154B (Landmark Biznes Mərkəzinin yaxınlığında, Fransız-Azərbaycan Universiteti ilə üzbəüz) ünvanında yerləşən “Fabrica” Qalereyasında ictimaiyyət üçün açıq olacaq. Sərgiyə giriş pulsuzdur.
FantazEU Mədəni İrs Festivalının proqramına həmçinin milli geyim sərgisi, incəsənət sərgiləri, canlı incəsənət vorkşopu, Aİ ölkələrindən onlayn şəhər turları və s. daxildir. Son məlumatları Aİ Azərbaycanadaki Nümayəndəliyinin Facebook səhifəsindən əldə etmək olar. https://www.facebook.com/EUDelegationtoAzerbaijan/.
“Arts Council Azerbaijan” Avropa İttifaqının Azərbaycandakı Nümayəndəliyi tərəfindən maliyyələşdirilən müqavilə ilə bu Festivala təşkilati dəstək göstərir.
