Sumqayıt Apellyasiya Məhkəməsində işgəncə verməkdə təqsirləndirilən Azər Qənbərovun barəsindəki hökmdən dövlət ittihamçısı tərəfindən verilən apellyasiya protesti üzrə məhkəmə iclası başa çatıb.
Pravda.az-ın əldə etdiyi məlumata görə, hakim Rəşadət Ağayevin sədrliyi ilə keçirilən prosesdə qərar elan olunub. Qərara əsasən, protest təmin edilməyib.
İttihama görə, Azər Qənbərov 17 iyul 2010-cu il tarixdən 11 yanvar 2011-ci il tarixdək, 09 dekabr 2011-ci il tarixdən 02 iyun 2018-ci il tarixdək, 25 sentyabr 2018-ci il tarixdən 13 noyabr 2019-cu il tarixədək və 2019-cu ilin noyabr ayının sonlarından 2023-cü ilin oktyabr ayının sonlarınadək olan müddət ərzində Xaçmaz şəhəri ərazisində kirayədə yaşadıqları istintaqa məlum olmayan ayrı-ayrı ünvanlarda heç bir əsaslı səbəb olmadan mütəmadi olaraq arvadının bədəninin müxtəlif nahiyələrinə qəsdən yumruq və təpik zərbələri endirib. Sonra qadın 2023-cü ilin oktyabr ayının sonlarında ərindən ayrılıb ata evində yaşayıb. O, 31 dekabr 2023-cü il tarixdə saat 21 radələrində sərxoş vəziyyətdə qayınatasıgilə gedib. Azər evə daxil olaraq arvadı, onun atası, anası və qardaşını döyrək onlara əzab verib. Xaçmaz Rayon Məhkəməsinin hökmü ilə Azər Qənbərovun Cinayət Məcəlləsinin 133.2.6-cı (işgəncə vermə) maddəsindən həmin Məcəllənin 128-ci (qəsdən sağlamlığa yüngül zərər vurma) maddəsinə tövsif edilib. O, 9 ay müddətinə azadlıqdan məhrum edilib.
Kamal Məmmədov
