Şotland mütəxəssis Devid Moyes, niderlandlı həmkarı Arne Slotun “Liverpul”un baş məşqçisi kimi fəaliyyətini qiymətləndirib.
Arena.az xəbər verir ki, bir sıra Premyer Liqa klublarında baş məşqçi olaraq çalışmış Moyes Britaniya mətbuatına açıqlamasında bunları söyləyib:
“Onlar Yurgen Klopun rəhbərliyi altında həmişə çox yaxşı komanda olublar, rəqiblərə isə “Enfild”də nəticə qazanmaq çox çətin olub. Fikrimcə, Arne Slot əla bir başlanğıc etdi. Amma deməliyəm ki, o, keçən ilki oyunçular dəstəsi ilə olsa da, əla iş görüb”, deyə Devid Moyes vurğulayıb.
Xatırladaq ki, Arne Slot məşqçilik fəaliyyətinə 2016/2017-ci illər mövsümündə “Kambur” klubunda başlayıb. Sonra niderlandlı mütəxəssis “AZ Alkmar” (2019/2020) və “Feyenoord”u (2021/2024) çalışdırıb. O, məhz bu iki komanda ilə uğurlu işi ilə adından söz etdirib.
Arne Slot “Liverpul”un sükanı arxasında cari ilin iyul ayından fəaliyyətdədir. “Qırmızılar” 46 yaşlı niderlandlı mütəxəssislə müddəti 2027-ci ilin iyun ayının sonuna qədər qüvvədə olacaq müqavilə imzalayıblar.
Niderlandlı mütəxəssis “Liverpul”u 16 oyuna çıxarıb, 14 qələbə, 1 heç-heçə, 1 məğlubiyyət yaşayıb, “qırmızılar”ın top fərqi isə 37:10 nisbətindədir.
Arne Slotun qənimətlər muzeyində “Feyenoord”la qazandığı Niderland çempionluğu və Niderland Kuboku var.
Futbol üzrə İngiltərə Premyer Liqasının 2024/2025-ci illər mövsümünün geridə qalmış 10 turundan sonra Arne Slotun “Liverpul”u 25 xalla yarış cədvəlinin zirvəsində qərarlaşıb. “Qırmızılar” UEFA Çempionlar Liqasının Liqa mərhələsində də keçirdiyi 4 oyundan qalib ayrılmış yeganə komandadır. İngiltərə nəhəngi hazırda 12 xalla ÇL-in Liqa mərhələsində turnir cədvəlinin vahid lideridir.
