Bakı-Sumqayıt istiqamətində hərəkət edən ekspress qatarın nasazlıq səbəbindən yolda qalması ilə bağlı məlumat yayılıb.
“Yenisabah”ın xəbərinə görə, bu gün saat 07:35-də və 07:45-də Sumqayıtdan hərəkət etməli olan qatarlar gecikib.
Nəticədə hər iki qatarın sərnişinləri Sumqayıt-Pirşağı-Bakı istiqamətində hərəkət etməli olan qatarlara yönəldilib. Bu isə həmin qatarlarda sıxlıq və sərnişinlər arasında gərginliyə səbəb olub. Həmin istiqamətdə qatarlar 10 dəqiqədən artıq gecikib.
Yaranmış problemlə əlaqədar “Azərbaycan Dəmir Yolları” QSC ilə əlaqə saxladıq. Qurumdan “Qafqazinfo”nun sorğusuna cavab olaraq bildirildi ki, gecikmə texniki nasazlıqla əlaqəli olub və artıq aradan qaldırılıb: “Bu gün səhər saatlarında Bakı-Pirşağı-Sumqayıt istiqamətində qatarların hərəkətində gecikmə müşahidə olunub. Buna səbəb həmin istiqamətdə kontakt şəbəkəsində yaranmış texniki nasazlıq olub.
Hazırda problem aradan qaldırılıb. Abşeron dairəvi marşrutunda qatarların hərəkəti qrafik üzrə davam etdirilir”.
