8 Noyabr – Zəfər Günü münasibətilə Aşıq Molla Cümə 46c ünvanında yerləşən “Loro Lounge” restoranında şəhid ailələri və qazilər üçün bayram tədbiri təşkil olunub.
“Qafqazinfo” xəbər verir ki, tədbirdə dövlət himni səsləndirilib və vətənimizin ərazi bütövlüyü uğrunda canlarından keçmiş vətən oğullarının əziz xatirələri bir dəqiqəlik sükutla yad edilib.
Tədbir zamanı çıxış edən Vətən müharibəsi qəhrəmanı Azad Hümbətovun atası və digər tədbir iştirakçiları xüsusi olaraq qeyd ediblər ki, Müzəffər Ali Baş Komandan İlham Əliyevin rəhbərliyi altında 30 ilə yaxın erməni işğalı altında olan torpaqlarımızın azad olunması 44 günlük Vətən müharibəsində böyük igidlik və şücaət göstərən ordumuzun gücünü bütün dünyaya göstərdi.
Həmçinin Vətən müharibəsində xüsusi şücaət göstərərək şəhid olanların ailə üzvlərinə və qazi olanlara dövlət tərəfindən göstərilən diqqət və qayğıya görə Prezident İlham Əliyevə və Birinci vitse-prezident Mehriban Əliyevaya minnətdarlıqlarını bildiriblər.
Daha sonra tədbirdə müğənnilərin ifasında vətənpərvərlik ruhunda mahnılar dinlənilib.
