“Azərbaycan COP29 kimi mötəbər bir tədbirə ev sahibliyi edəcək. Bundan öncə COP tədbirlərinə ev sahibliyi edən ölkələrin hazırlıq üçün ən az iki il vaxtı olurdu. Azərbaycanın isə vaxtı çox qısa idi və cəmi 10 ay ərzində COP29-a hazırlıq prosesini həyata keçirdi. Xarici ekspertlərin rəyini nəzərə alsaq, deyə bilərik ki, Azərbaycan bu işin öhdəsindən layiqincə gəlib. Bilirsiniz ki, COP29 çox ağır, böyük məsuliyyətli bir tədbirdir. Artıq tədbirin baş tutmasına günlər qalıb. İnanırıq ki, belə ağır və məsuliyyətli işin öhdəsindən layiqincə gələcəyik. Cənab Prezidentin COP29-la bağlı tədbirin keçiriləcəyi məkana səfəri zamanı bir daha əmin olduq ki, tədbirə tam hazırıq”.
NOCOMMENT.az xəbər verir ki, bu sözləri Pravda.az-a açıqlamasında Milli Məclisin deputatı Naqif Həmzəyev deyib.
“Xüsusilə dünya liderlərinin bu tədbirə qatılmaqla ilə bağlı verdikləri təsdiq, həmçinin çoxlu sayda ekspertlərin COP29-a qatılması deməyə imkan verir ki, biz COP29-la bağlı öhdəliklərimizin ən önəmlilərini yerinə yetirmişik. Tezliklə qonaqlar Bakıya təşrif buyuracaqlar. Təəssüf ki, dünya dövlətlərinin və bəzi xarici ekspertlərin, siyasətçilərin ikiüzlülüyünün, ikili standartlardan çıxış etmələrinin şahidi olduq. Bu tədbirin Azərbaycanda keçirilməsini dəstəkləyən dövlətlərin də siyasətçiləri növbəti dəfə riyakarlıq, ikiüzlülük nümayiş etdirdilər. Ancaq istənilən halda unutmamalıyıq ki, bu tədbir siyasi yox, iqlim dəyişikliklərini özündə ehtiva edən bir tədbirdir. Bu baxımdan COP20-u siyasiləşdirmək, Azərbaycana qarşı siyasi alət kimi istifadə etmək yersiz idi. COP29 ərəfəsində və ondan sonrakı dövrdə də bu cür riyakarlar olacaq. İstənilən halda Azərbaycan bu ağır və məsuliyyətli işin də öhdəsindən layiqincə gələcək. Qətiyyən imkan verməyəcəyik ki, bu tədbiri siyasiləşdirsinlər.
COP29-a təşrif buyuracaq dünya liderləri də məhz bunun ciddiyyətini anladıqları üçün tədbirdə yaxından iştirak edəcəklər. COP29 zamanı baş verə biləcək hər hansı siyasi təxribat və açıqlamaları ciddi qəbul etmək lazım deyil. Çünki bu, birbaşa erməni lobbisinin təzyiqi, təsiri altında həyata keçirilir və keçiriləcək. Eyni zamanda Azərbaycanın qazandığı yeni reallıqları qəbul etmək istəməyən, Azərbaycanı daima təzyiq altında saxlamaq istəyən bəzi güclərin istəkləri və sifarişləri əsasında reallaşdırılacaq. Yetərincə belə təzyiqləri görmüşük və buna qarşı immunitetimiz güclüdür. Baş verə biləcək digər məkrli hücumların da qarşısını layiqincə alacağıq. Həm indi, həm də növbəti COP tədbirlərinə dair öhdəliklərimizi uğurla həyata keçirəcəyik. COP29 Azərbaycanın gücünə güc qatacaq. Xüsusilə, iqlim dəyişiklikləri ilə, Azərbaycanın və regionun, o cümlədən planetin problemləri ilə bağlı müsbət qərarların veriləcəyinə birlikdə şahidlik edəcəyik”.
