Bakı, TurkicWorld
ABŞ hərbçiləri, İranın mümkün təhdidlərinə qarşı xəbərdarlıq məqsədilə Yaxın Şərq bölgəsinə F-15 qırıcı təyyarələrinin yerləşdirildiyini açıqlayıb.
TurkicWorld xəbər verir ki, bu addım, Vaşinqtonun oktyabr ayında bölgəyə əlavə hərbi güc göndərmə qərarından bir həftə sonra həyata keçirilib.
Belə ki, ABŞ Müdafiə Nazirliyi (Pentaqon) ötən həftə Yaxın Şərqə bombardmançı təyyarələr, qırıcılar, yanacaqdoldurma və hava hücumundan müdafiə sistemləri göndərəcəyini bildirmişdi.
Pentaqonun açıqlamasında İran və onun tərəfdaşlarının ABŞ-ın bölgədəki maraqlarına və ya personalına hücum etməsi halında, ABŞ-ın özünümüdafiə üçün bütün zəruri tədbirləri görəcəyi vurğulanıb.
Qeyd edək ki, ABŞ-ın müttəfiqi İsrail, 7 oktyabr 2023-cü ildən bəri Qəzza zolağında Fələstin HƏMAS hərəkatına qarşı müharibə aparır və şimal sərhədində Livanın Hizbullah qruplaşması ilə də açıq münaqişə içindədir. İranın bu il ərzində İsrailə qarşı atdığı iki raket zərbəsi isə xüsusilə diqqət çəkir.
İlk hücum, İsrailin Dəməşqdəki konsulluğuna edilən hücumdan sonra aprel ayında həyata keçirilib, ikincisi isə oktyabr ayında Hizbullah lideri Həsən Nəsrullahın və HƏMAS lideri İsmayıl Heniyanın sui-qəsd iddialarına cavab olaraq baş verib.
Bu son hücuma cavab olaraq, oktyabrın 26-da İsrail İrandakı hərbi obyektlərə hava zərbələri endirib. Bu qarşılıqlı hücumlar, bölgədə gərginliyin artmasına və yeni bir münaqişə mərhələsinin başlanmasına səbəb olub. ABŞ isə, İran və onun müttəfiqlərinin hər hansı bir təhdidinə qarşı diqqətli olduğunu və bölgədəki maraqlarını qorumağa hazır olduğunu bildirir.
