Serbiyanın “Srvena Zvezda” klubu İspaniya nəhəngi Madrid “Real”ına qıcıqlandırıcı ismarış ünvanlayaraq, qara zarafat edib.
Arena.az məlumat verir ki, Serbiya klubunun mətbuat xidməti “Srvena Zvezda”nın Çempionlar Liqasının Liqa mərhələsinin 4-cü turunda Belqradda “Barselona”ya 2:5 hesablı məğlubiyyətindən sonra, klubun rəsmi “X” sosial şəbəkə hesabı üzərindən “Real”ın ünvanına yazı dərc edib:
“Xoş gördük, Madrid “Realı”, biz uduzsaq da, əvəzində iki qol da vurmuşuq”. Serbiya klubu bu məzmunlu ismarışla “Real”ın İspaniya La Liqasının 11-ci turunda “Sanyaqo Bernabeu”da “Barselona”ya 0:4 hesablı məğlubiyyətinə qara zarafatla eyham vurub.
Həmçinin Serbiya nəhənginin mətbuat xidməti bu dərci qısa video kəsimlə müşayiət edib. Burada “Barselona” ilə oyunda “qaymaqlılar”ın 12 dəfə oyundankənar vəziyyətə düşməsi amili qabardılıb.
“Real” düşərgəsindən müvafiq “şitliyə” hələ cavab verilməyib.
