9 Noyabr Azərbaycan Respublikasında Dövlət Bayrağı Günü kimi qeyd olunur və bu tarix hər bir azərbaycanlı üçün böyük əhəmiyyətə malikdir. Bayraq Günü 2009-cu ilin noyabrın 17-də Prezident cənab İlham Əliyevin Sərəncamı ilə təsis edilib və hər il ölkə miqyasında rəsmi bayram kimi qeyd edilir. Azərbaycanın üçrəngli bayrağı ilk dəfə 1918-ci ildə Azərbaycan Xalq Cümhuriyyəti dövründə qaldırılıb. Həmin dövrdə qəbul edilmiş üçrəngli bayraq milli istiqlaliyyət, dövlət müstəqilliyi və Azərbaycanın öz tarixi köklərinə olan bağlılığını simvollaşdırırdı. 1920-ci ildə Azərbaycan Xalq Cümhuriyyətinin süqutundan sonra bu bayraq bir müddət istifadədən çıxarıldı, lakin Azərbaycan xalqının milli yaddaşında həmişə qaldı. Azərbaycan yenidən müstəqillik əldə etdikdən sonra, 1991-ci ildə üçrəngli bayraq yenidən dövlət bayrağı olaraq rəsmi status aldı və Azərbaycan Respublikasının simvolu kimi təsdiq edildi. Dövlət Bayrağı Günü Azərbaycanın hər bir bölgəsində geniş tədbirlərlə qeyd edilir. Bu gün həm dövlət qurumlarında, həm də təhsil müəssisələrində bayraq haqqında məlumatlandırıcı tədbirlər keçirilir, müxtəlif sərgilər, yürüşlər təşkil olunur. Bakıda Bayraq Meydanında yerləşən nəhəng dövlət bayrağımız isə Azərbaycan xalqının milli qürur mənbəyidir. 162 metr hündürlüyündə dalğalanan bu bayraq, təkcə Azərbaycan xalqının yox, həm də bütün türk dünyasının birliyinin simvolu olaraq qürurla dalğalanır.
Bu gün Azərbaycanın Dövlət Bayrağı ölkəmizin bütün ərazisində qürurla dalğalanır. 2020-ci ildə Müzəffər Ali Baş Komandan, Prezident İlham Əliyevin rəhbərliyi ilə şanlı Azərbaycan Ordusu işğal altındakı torpaqlarımızı düşmən işğalından qurtararaq ərazi bütövlüyümüzü bərpa edib. Azərbaycan əsgəri bayrağımızı 28 il həsrətində olduğumuz Cəbrayıl, Füzuli, Zəngilan, Qubadlı, Şuşa şəhərlərində, Hadrut, Ağbənd qəsəbələrində, Suqovuşanda, işğaldan azad olunmuş 200-dən çox kənddə ucaldıb. Dövlət Bayrağı Gününə ən böyük müjdə isə 2020-ci ildə verildi. Prezident İlham Əliyev 2020-ci il noyabrın 8-də – Dövlət Bayrağı Günü ərəfəsində üçrəngli bayrağımızın Şuşada ucaldıldığını xalqımıza bəyan etdi. Bundan sonra yüz minlərlə insan əllərində Azərbaycan Bayrağı küçələrə çıxaraq Şuşa Zəfərinin sevincini paylaşdı. Şuşanın 28 ildən sonra düşmən tapdağından qurtarılması Bayraq Günü ilə bir vaxta təsadüf etdi. Şuşaya bayrağımızın sancıldığı 2020-ci ilin 8 noyabr günü Azərbaycan tarixinə əbədi həkk olunacaq. Bu şanlı səhifəni tariximizə Azərbaycan Prezidenti, Müzəffər Ali Baş Komandan İlham Əliyev yazdı.Vətənin müdafiəsi zamanı həlak olmuş şəhidlərimiz torpağa tapşırılarkən onlar uğrunda canlarını fəda etdikləri bayrağa bükülürlər. Həmin şərəfə hər kəsin sahib olmayacağını bildiyimiz üçün, həyatdaykən bayrağımızın yüksək zirvələrə daşınmasına çalışmalıyıq.
Sitarə Muxtarlı,
YAP Xətai rayon təşkilatının "Telnov 6" ünvanı üzrə ərazi partiya təşkilatının üzvü
