Livanın keçmiş baş nazirinin qətlindən məsul olan Hizbullah komandiri Səlim Cəmil Ayyaş İsrailin hava hücumu nəticəsində öldürülüb.
Musavat.com xəbər verir ki, bu barədə Səudiyyə Ərəbistanı mətbuatı məlumat yayıb.
Əl-Ərəbiyyə telekanalı bildirir ki, Cəmil Ayyaş Hizbullahın əsas bazası sayılan Əl-Quseyr şəhəri yaxınlığında öldürülüb. ABŞ Dövlət Departamentinin məlumatına görə, başına 10 milyon dollar mükafat qoyulan Ayyaş Hizbullahın 151-ci bölməsinin yüksək vəzifəli üzvü olub.
2020-ci ildə Ayyaş beynəlxalq tribunal tərəfindən 2005-ci ildə Beyrutda Livanın keçmiş baş naziri Rafik Həririnin qətlinə görə qiyabi olaraq ömürlük həbs cəzasına məhkum edilmişdi. Hizbullahın o zamankı lideri Həsən Nəsrullah Ayyaşı və nəticədə bəraət qazanan digər üç müttəhimlə birlikdə səlahiyyətlilərə təhvil verməkdən imtina etmişdi.
Şahanə Rəhimli
Musavat.com
