“Real”ın ispan keçmiş müdafiəçisi Serxio Ramos Madrid klubuna qayıtması ilə bağlı azarkeşlərin çağırışlarına qarşılıq verib.
Arena.az xatırladır ki, bu çağırış, “Real”ın braziliyalı mərkəz müdafiəçisi Eder Militaonun ağır zədə alaraq cari mövsümün sonuna qədər sıradan çıxması mənzərəsində baş verib.
Xatırladaq ki, Serxio Ramos hazırda azad agent qismində klubsuzdur və özünə yeni düşərgə axtarır.
Ramos xüsusən “Real”ın əfsanəsi, ispan keçmiş yarımmüdafiəçi Qutinin bu məsələ ilə bağlı şərhini qiymətləndirib. Belə ki, Quti İspaniya La Liqasının 13-cü turunda “Real”ın “Osasuna”nı 4:0 hesabı ilə darmadağın etdiyi və Eder Militaonun zədələndiyi oyundan sonra şərhində sözün əsl mənasında belə bir fikir səsləndirb:
“Mən Serxio Ramosu “Real”a qaytarmaq seçimini nəzərdən keçirərdim. O, indi azad agentdir, onun qayıtması kluba 0 avro məbləğə başa gələcək”, deyə Quti bildirib.
Qısa müddətdən sonra Qutinin sözləri internetdə yayılıb, Ramos isə Qutinin idman nəşrlərindən birinin səhifəsində dərc edilmiş açıqlamasını bəyənərək, buna bir “like” atıb.
Xatırladaq ki, Ramos 2005-2021-ci illər aralığında “Real”da çıxış edib və “qaymaqlılar”ın döyünən ürəyi olaraq sevilib.
Veteran Ramos 2023-cü ilin iyununda PSJ-dən ayrıldıqdan sonra azad agent statusunda idi. Müdafiəçi doğma klubu “Sevilya”ya qayıdışı üçün maaşında ciddi azalmaya belə, razılaşmış və “Sevilya” ilə müddəti 2023/2024-cü illər mövsümünün sonuna qədər qüvvədə olacaq müqavilə imzalamışdı.
2023/2024 mövsümündə Ramos “Sevilya”nın heyətində bütün yarışlarda 37 oyuna 7 qol vurub, 1 məhsuldar ötürmə verib.
Ramos “Sevilya”nın məzunudur və Əndəlüs komandasının heyətində 2003-2005-ci illərdə çıxış etdiyi dövrdə 50 oyun keçirib, 3 qol vurub. Veteran müdafiəçinin “Sevilya”nın heyətində çıxışının ümumi mənzərəsi isə belədir: 87 oyun, 10 qol, 1 məhsuldar ötürmə.
Ramosun karyerasının ən məhsuldar dövrü “Real”da keçib
Təcrübəli futbolçu 18 ildən sonra doğma klubuna qayıtmışdı. Müdafiəçi 2005-ci ildə məhz “Sevilya”dan “Real”a keçmişdi. Ramos karyerasının ən məhsuldar dövrünü “Real”da keçirib. İspan müdafiəçi 2015-2021-ci illərdə “Real”ın kapitanı olub. Ramos “Kral klubu” ilə 5 dəfə İspaniya La Liqasını, 2 dəfə İspaniya Kral Kubokunu, 4 dəfə İspaniya Super Kubokunu, 4 dəfə UEFA Çempionlar Liqasını, 3 dəfə UEFA Super Kubokunu, 4 dəfə FIFA Klub Dünya Kubokunu qazanıb.
2021-2023-cü illər aralığında Ramos PSJ-nin heyətində 58 oyun keçirib, 6 qol vurub, 1 məhsuldar ötürmə verib. İspan müdafiəçi parislilərlə 2 dəfə Fransa çempionatını (2021/2022, 2022/2023) və Fransa Super Kubokunu (2022/2023) qazanıb.
Serxio Ramos 2005-ci ilin mart ayında debüt etdiyi İspaniya yığmasının heyətində 180 oyun keçirib, 23 qol vurub, 8 məhsuldar ötürmə verib. Ramos İspaniya yığması ilə DÇ-2010-da, AÇ-2008-də və AÇ-2012-də qalib olub. Müdafiəçi həmçinin İspaniyanın U-19 yığması ilə AÇ-2004-ün qalibi olub.
“Transfermarkt” internet-portalı 38 yaşlı mərkəz müdafiəçisinin transfer dəyərini 1,8 milyon avro məbləğində qiymətləndirir.
