“Real”ın braziliyalı ulduz hücumçusu Vinisius Junior hesab edir ki, son uğursuzluqlardan sonra, “Real”ın öz oyununu tapıb.
Arena.az “Marca” nəşrinə istinadən, braziliyalı ulduzun bu barədə fikrini təqdim edir:
“Mən ən yaxşı idman formamdayam. Ümidvaram ki, çoxlu qənimətlər qazanacağıq. İndi məşqçi həll yolunu tapıb”, deyə “Vini” bildirib.
Xatırladaq ki, “Real” ardıcıl olaraq iki oyunda doğma “Santyaqo Bernabeu”da ağır məğlubiyyətlər yaşamışdı. Əvvəlcə, İspaniya La Liqası çərçivəsində “Barselona” “Real”ı 4:0 hesabı ilə məğlub etmiş, ardınca isə “Milan” Çempionlar Liqası oyununda “qaymaqlılar” üzərində 3:1 hesablı qələbə qazanmışdı. Ədalət naminə qeyd etmək gərəkdir ki, bütün bunlar “Real”ın zədə silsiləsi ilə üzləşdiyi mənzərədə baş verib. Son oyununda isə “Real” La Liqa oyunu çərçivəsində qəbul etdiyi oyunda “Osasuna” üzərində 4:0 hesablı qələbə qazanraq, iddiasını ortaya qoyub. Vinisius Junior isə “qaymaqlılar”ın qələbəsinə het-triklə töhfəsini verib. Əlavə edək ki, İspaniya nəhəngi çıxış etdiyi bütün yarışlarda mübarizəsini davam etdirir.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 17 oyuna çıxıb, 12 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 281 oyun, 95 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
