17 yaşadək futbolçulardan ibarət Azərbaycan millisinin (U-17) baş məşqçisi İlham Yadullayev AFFA-nın rəsmi saytına açıqlama verib.
Arena.az xəbər verir ki, o, Avropa çempionatının seçmə mərhələsində keçiriləcək oyunlarla bağlı fikirlərini paylaşıb:
“Noyabrın 4-8-i aralığında Qəbələdə yaxşı təlim-məşq toplanışı keçdik. Həm daxili çempionatda çıxış edən, həm də ölkə xaricində oynayan uşaqlar yaxşı formadadırlar. Hazırda bütün diqqətimizi Macarıstan yığmasına qarşı keçirəcəyimiz ilk oyuna yönəltmişik. Bu matçın üzərində ətraflı təhlil aparmışıq. Macarıstan yığması püşkatma zamanı A səbətindən çıxıb, güclü komandadır. Buna baxmayaraq, komanda olaraq ilk oyunda uğurlu nəticə əldə etmək istəyirik”.
İlham Yadullayev hər oyuna qələbə qazanmaq üçün çıxacaqlarını söyləyib:
“Yunanıstan və Rumıniya komandalarını da təhlil etmişik. Buradakı matçlarını canlı izləməyə və futbolçuları buna uyğun məlumatlandırmağa çalışacağıq. Məqsədimiz maksimum dərəcədə yaxşı çıxış etmək olacaq və hər üç görüşdə qələbəyə köklənəcəyik. Belə turnirdə qazanılacaq hər xal önəmlidir”.
Qeyd edək ki, Avropa çempionatının seçmə mərhələsinin 6-cı qrupunda yer alan U-17 millimiz noyabrın 13-də Macarıstan, 16-da Yunanıstan və 19-da Rumıniya yığması ilə qarşılaşacaq. Qrupun bütün oyunları Rumıniyanın paytaxtı Buxarestdə təşkil olunacaq.
