"Türkiyə Zəngəzur dəhlizinin, o cümlədən onun enerji komponentinin açılmasında maraqlıdır".
Teleqraf.com xəbər verir ki, bunu "Report"a Türkiyənin energetika və təbii sərvətlər naziri Alparslan Bayraktar deyib.
"Biz bu xəttin (Zəngəzur dəhlizi) həm enerji nöqteyi-nəzərindən, həm də digər tərəflərdən reallaşmasını çox istəyirik. Çünki bu, həm bizim üçün, həm də Avropa üçün çox vacibdir. Ona görə də bu layihənin reallaşacağına ümid edirəm", - A.Bayraktar bildirib.
O, həmçinin iqlim dəyişikliyi ilə mübarizə məsələsinə də toxunub.
"Biz indi "yaşıl transformasiya"ya həsr olunmuş iqlim konfransındayıq. Hamı iqlim dəyişikliyi haqqında nələrsə danışır. Edəcəyimiz ən vacib şey ölkələr və regionlar arasında kommunikasiyaları genişləndirməkdir. Ən mühüm qarşılıqlı əlaqə isə külək enerjisi üzrə böyük potensialı olan Xəzər dənizidir. Yanılmıramsa, Dünya Bankının məlumatına görə, bu potensial 7 500 MVt təşkil edir", - nazir qeyd edib.
O, Türkiyəyə və bu dəhliz vasitəsilə Avropaya böyük həcmdə "yaşıl enerji" tədarükünü nəzərdə tutan layihənin miqyasını qeyd edib.
"Biz bu istiqamətdə işləyirik. Bundan əlavə, Naxçıvanda da günəş enerjisi potensialı yüksəkdir. Biz bu günəş elektrik enerjisinin Türkiyəyə tədarükü üzərində işləyirik", - A.Bayraktar əlavə edib.
