Gürcüstanda prezident seçkilərinin 2025-ci il yanvarın əvvəlində keçiriləcəyi gözlənilir.
Yeniavaz.com “Exo Kavkaza” istinadən xəbər verir ki, bu barədə Baş nazir İrakli Kobaxidze bildirib.
Qeyd olunur ki, prezident ilk dəfə olaraq Gürcüstan əhalisi tərəfindən deyil, Seçicilər Kollegiyası tərəfindən seçiləcək. Seçkilər yeni seçilən parlamentin ilk iclasından sonra 45 gün ərzində keçirilməlidir.
Konstitusiyaya əsasən, kollegiyaya Gürcüstan parlamentinin bütün üzvləri və Abxaziya və Acarıstan muxtar respublikalarının ali nümayəndəlik orqanları daxil olmaqla 300 üzv daxil olacaq.
Gürcüstanda prezident seçkiləri parlament sarayında keçiriləcək. Seçki Şurasının ən azı 30 üzvü namizəd irəli sürmək hüququna malikdir. Seçicilər Kollegiyasının tam tərkibinin ən azı üçdə ikisinin səsini toplayan namizəd seçkilərin birinci turunda seçilmiş sayılır. Gürcüstan prezidenti birinci turda seçilməsə, ikinci turda birinci turda ən yaxşı nəticə göstərən 2 namizəd arasında səsvermə keçirilir. Ən çox səs toplayan namizəd ikinci turda seçilmiş sayılır.
