Yeni seçilmiş prezident Donald Tramp administrasiyasında əsas vəzifələrə göstərdiyi namizədlərlə hər kəsi çox təəccübləndirib.
Azpost.info bildirir ki, ən böyük sürpriz isə onun ABŞ-ın müdafiə naziri postuna “Fox News”in 44 yaşlı teleaparıcısı Pit Heqseti irəli sürməsi olub. Heqset ənənəvi olaraq Respublikaçılara dəstək verən kanalda Fox & Friends Weekend proqramının aparıcısıdır. On ildir çalışdığı bu proqramda gələcək nazir verilişin tez-tez qonağı olan Trampla görüşüb.
Pit Heqset- ABŞ-ın gələcək müdafiə naziri kimdir?
Associated Press Agentliyi qeyd edir ki, Senat Heqseti təsdiqləsə, o, bir sıra qlobal böhranlar zamanında – Ukrayna və Yaxın Şərqdəki münaqişədən tutmuş ABŞ-da Rusiya və Şimali Koreya arasında ittifaqla bağlı artan narahatlıqlara qədərki dövrdə Pentaqona rəhbərlik edəcək. Bununla bağlı onun ixtisası ilə bağlı artıq suallar verilir. Düzdür, burada yada salmaq olar ki, Avropa Komissiyasının hazırkı rəhbəri, ixtisasca ginekoloq olan Ursula fon der Leyen 2013-cü ildə Almaniyanın müdafiə naziri olub. Onun heç bir hərbi təcrübəsinin olmaması bu təyinata mane olmamışdı.
Ursuladan fərqli olaraq, Pit orduda xidmət edib – o, Milli Qvardiyada piyada kapitanı olub, Əfqanıstanda, İraqda və Kubadakı Quantanamo bazasında ezamiyyətdə olub. Bir vaxtlar o, “Amerikaya biganə olmayan Veteranlar” təşkilatına rəhbərlik edib. Hətta 2012-ci ildə Senat üçün uğursuz olmuş namizədliyini də irəli sürüb.
Heqset həm də “Döyüşçülərlə müharibə” kitabının müəllifi kimi tanınır. Burada o, tolerantlıq, siyasi düzgünlük və inklüzivlik kimi liberal ideyaların üstünlüyünə zərbə vurur. Heqest 2007-ci ildə Bağdadda İraq vətəndaşlarını güllələməkdə təqsirli bilinən “Blackwater” özəl hərbi dəstəsinin 4 üzvünün işini müdafiə edib. Yeri gəlmişkən, Tramp prezidentlik müddətinin sonunda onları əfv etdi ki, bu da artıq “ruh yaxınlığından” xəbər verir.
“Pitə bu vəzifəni verməklə Amerikanın düşmənlərinə xəbərdarlıq ediləcək. Ordumuz yenidən möhtəşəm olacaq. Pit bizim “Güc vasitəsilə sülh” siyasətimizin cəsarətli və vətənpərvər tərəfdarı olacaq” – deyə Tramp açıqlamasında deyib.
AP-nin istinad etdiyi bəzi amerikalı ekspertlər Heqestin təyinatını belə izah ediblər: Tramp müdafiə nazirləri ilə mübarizə aparmaqdan yorulmuşdu. Onun prezidentliyinin birinci dövründə altı dəyişiklik olmuşdu. Tramp sadəcə olaraq ona sadiq olanı seçdi.
MARKO RUBİO DÖVLƏT KATİBİ OLACAQ. Ukrayna HAQQINDA NƏ DEYİR?
Milli təhlükəsizlik bölməsinə digər təyinatlar arasında Texasdan keçmiş Respublikaçı konqresmen Con Ratkliff də var. O, MKİ-nin rəhbəri vəzifəsinə namizəddir. Trampın birinci müddətinin sonunda o, milli kəşfiyyatın direktoru vəzifəsində çalışıb. Arkanzas ştatının keçmiş qubernatoru Mayk Hakabi İsraildə səfir olacaq. Hakabi yəhudi dövlətinin sadiq müdafiəçisidir və Trampın ABŞ xarici siyasətini İsrailin maraqları ilə daha sıx uyğunlaşdırmaq planlarına tam uyğun gəlir.
Prezidentin çoxdankı dostu və qolf partnyoru Steven Uitkoff Yaxın Şərq üzrə xüsusi elçi olacaq. Bu həm də Ağ Evin gələcək sahibinin əsas vəzifələrə özünə yaxın adamları təyin etmək istəyindən xəbər verir.
Cənubi Dakota qubernatoru Kristi Noem Daxili Təhlükəsizlik Departamentinin rəhbəri vəzifəsinə irəli sürülüb. Məhz bu nazirlik onun ölkədən 11 milyona yaxın qanunsuz miqrantların kütləvi şəkildə deportasiyası ilə bağlı Tramp planını həyata keçirəcək.
Tramp bir gün əvvəl dövlət katibi və milli təhlükəsizlik üzrə köməkçi seçimi ilə bağlı qərar vermişdi: senator Marko Rubio yeni prezidentin xarici siyasətinə rəhbərlik edəcək, konqresmen Maykl Vals isə dövlət başçısına təhlükəsizliklə bağlı məsləhət verəcək.
Hələlik təyinatı rəsmən açıqlanmayan 53 yaşlı Rubio Çinlə bağlı son dərəcə sərt mövqeyi ilə tanınır. O, hətta Çin sanksiyalarına, o cümlədən Səma İmperiyasına giriş qadağasına məruz qalıb. Ukraynadakı silahlı münaqişəyə gəlincə, o, Trampın mövqeyini dəstəkləyir: dayanmaq vaxtıdır. Rubio Moskva ilə Kiyev arasında danışıqların tərəfdarıdır və Zelenskinin itirdiyi ərazilərin Rusiyada qalmasını faciə görmür.
Yeri gəlmişkən, Rubio ABŞ-ın ispan əsilli ilk dövlət katibi olacaq.
50 yaşlı Mayk Vals Virciniya Hərbi İnstitutunu fərqlənmə diplomu ilə bitirib və 27 il Orduda və Milli Qvardiyada xidmət edib. O, xüsusi təyinatlılarda olub, Əfqanıstanda döyüş əməliyyatlarının veteranıdır. O, həmişə Çini ABŞ üçün “ən ciddi təhlükə” hesab etdiyini söyləyib və yazıb.
MİLYARDERLER ELON MUSK VƏ VİVEK RAMASVAMI BÜROKRATLARI “ƏZƏCƏK”
Tramp deyib: “Amerikalı vətənpərvər Vivek Ramasvami ilə birlikdə çalışan böyük İlon Maskın Hökumətin Effektivliyi Departamentinə (DOGE) rəhbərlik edəcəyini elan etməkdən məmnunam”.
Dünyanın ən varlı adamı, 30-40 yaş arası ən zəngin amerikalı (Ramasvami indi 39 yaşındadır) ilə birləşərək bürokratlarla məşğul olacaq, federal agentlikləri dağıdacaq, ən əsası dövlət xərclərini azaldacaq. Böyük Amerika Təmizləməsi Gəlirmi?
Əgər Mask haqqında çox şey biliriksə, Vivek Ramasvami adı az tanışdır.
O, sərvətini tibb və əczaçılıq sahəsində qazanıb, təxminən bir milyard dollar qazanıb. Vivekin validynləri hindistanlı mühacirlər olub. Mühəndis ata və psixiatr ananın oğlu olan Vivek Harvard və Yel universitetlərini bitirib. O, öz ixtisası kimi əczaçılıq sahəsinə sərmayə qoymağı seçib. Sonra bir investisiya fondunda işə düzəlib. Əczaçılıq sahəsinə sərfəli sərmayə qoyaraq ilk milyonlarını qazanıb.
Nəhayət, Ramaswami Roivant Sciences adlı öz holdinqini qurub və dərman şirkətlərindən sifarişlrini almağa başlayıb. Vivek daha sonra siyasətə keçib. Keçən il hətta Respublikaçıların praymerizində Trampla rəqabət aparmağa çalışıb. O, Ukraynanın NATO-ya daxil olmasının əleyhinə çıxış edib və ərazilərin Ukraynaya qaytarılması planını qeyri-real hesab edir.
İlon Mask artıq X sosial şəbəkəsində söz verib ki, maksimum şəffaflıq üçün yeni departamentin fəaliyyəti internetdə öz əksini tapacaq. Maskın xəzinə üçün 2 trilyon dollara qədər “səmərəsiz” xərclərə qənaət etmək vəd edib.
Amma artıq suallar da səslənir: İmperiyası böyük və əlində gəlirli dövlət müqavilələri olan Maskın hökumət postuna təyinatı maraqların toqquşmasına səbəb olacaqmı?
Azpost.info
