Böyük Britaniyada istehlakçı hüquqlarını qoruyan "Which?" təşkilatı, "Apple" şirkətinə qarşı "iCloud" bulud saxlama xidmətindən istifadə edən təxminən 40 milyon istifadəçi adından rəqabət qanunvericiliyi çərçivəsində hüquqi iddia qaldırıb.
Valyuta.az "TechCrunch"a istinadən xəbər verir ki, məhkəmə prosesi çərçivəsində təxminən 3 milyard funt sterlinq (hazırkı məzənnə ilə 3,8 milyard dollar) məbləğində təzminat tələb olunur. İddiada "Apple" şirkətinin öz bulud saxlama xidmətinə üstünlük verməklə rəqabət qaydalarını pozduğu və istifadəçiləri "həddindən artıq qiymətlərlə" "iCloud" xidmətinə məcbur etdiyi iddia olunur.
"iOS-un monopoliyası var və "Apple" öz əməliyyat sistemlərini idarə edir. "Apple"ın həmin üstünlükdən bulud saxlama bazarında ədalətsiz üstünlük əldə etmək üçün istifadə etməməsi vacibdir. Lakin məhz bu baş verib," deyə "Which?" təşkilatı bu iddianı Böyük Britaniyanın "Rəqabətə Apelyasiya Məhkəməsi"nə (CAT) təqdim etdiyini açıqlayıb.
İddiada "Apple"ın öz cihazlarının istifadəçilərini şəkil və digər məlumatların saxlanması üçün "iCloud" xidmətinə abunə olmağa təşviq etməsi və eyni zamanda alternativ saxlama xidmətlərindən istifadənin çətinləşdirilməsi qeyd olunub. Buraya istifadəçilərin telefonlarının bütün məlumatlarını üçüncü tərəf təminatçıları ilə saxlaması və ya ehtiyat nüsxə etməsinə imkan verilməməsi də daxildir.
"iOS istifadəçiləri şəkillər, qeydlər, mesajlar və digər məlumatlar pulsuz 5 GB limiti aşdıqda bu xidmət üçün ödəniş etməli olurlar," deyə "Which?" bildirib.
İddia, həmçinin, "Apple"ı Böyük Britaniyada "iCloud" abunəliyini digər xidmətlərlə rəqabətin olmadığı üçün həddindən artıq yüksək qiymətlərlə təqdim etməkdə ittiham edir. "Apple 2023-cü ildə Böyük Britaniya istehlakçıları üçün "iCloud" qiymətini saxlama pillələri üzrə 20%-dən 29%-ə qədər artırdı," deyə təşkilat bildirib. Bu artımla bağlı "Apple" müştərilərinə kompensasiya tələb edən təşkilat, hər bir istehlakçının ödədiyi məbləğə əsasən, təxminən 70 funt sterlinq ( 90 dollar) təzminat ala biləcəyini ehtimal edir.
Qeyd edək ki, Mart ayında ABŞ-da da "Apple"ın bulud saxlama bazarında qanunsuz monopoliyaya sahib olduğunu iddia edən oxşar bir iddia qaldırılıb və "Apple"ın onu rədd etmək cəhdləri nəticəsiz qalıb.
Rəhim
