Əgər Vaşinqton Ukraynaya dəstəyi dayandırmaq qərarına gəlsə, bu, ABŞ üçün Əfqanıstandan geri çəkilməkdən daha böyük rüsvayçılıq olacaq...
Poliqon xəbər verir ki, bu fikri Böyük Britaniyanın keçmiş xarici işlər naziri Uilyam Heyq Britaniyanın The Telegraph qəzetinin podkastında bildirib.
O vurğulayıb ki, prezident Trampın gələcək administrasiyası Ukraynanın dağılmasına icazə verərsə, bu, ABŞ-ın nüfuzuna təsir edəcək.
Heyq deyib ki, Tramp Co Baydeni Əfqanıstanla bağlı verdiyi qərarlara görə tənqid edir, ancaq o, Ukraynanın dağılmasına səbəb olsarsa, bu, ABŞ üçün daha böyük rüsvayçılıq olacaq.
"Dünyada Qərbin gücünü dəstəkləmək Trampın öz maraqlarına uyğundur", deyə Heyq qeyd edib.
Eyni zamanda, keçmiş nazir Tramp administrasiyasını müharibəni tezliklə həll etmək və ya onu Rusiya üçün əlverişli şərtlərlə həll etmək ümidinə qarşı xəbərdarlıq edib. O qeyd edib ki, təmas xəttində müharibənin dondurulması yeni müharibənin əsasının qoyulması demək olacaq.
"Bu, üçüncü müharibəyə gətirib çıxaracaq, çünki Putin geridə qalanlar üçün yenidən gələcək. Çox aydındır, o, bütün Ukraynanı istəyir. Ən azı o qədər istəyir ki, qalan dövlətlər suveren dövlət kimi fəaliyyət göstərməsin, Avropa İttifaqı, NATO üzvü olmasın, kreditlər götürməsin, yenidənqurma üçün pul ala bilməsin, yəni funksional dövlət olmasın", deyə Heyq ifadə edib.
Onun sözlərinə görə, ABŞ və NATO-nun təhlükəsizlik zəmanəti olmadan Ukrayna bir dövlət kimi mövcud ola bilməyəcək, Putini iki ildən sonra, silahlı qüvvələrini yenidən qurduqdan sonra dayandıra bilməyəcək:
"Siz sadəlövhlüklə deyə bilərsiniz ki, biz 24 saat ərzində sülhü bərqərar edəcəyik, lakin siz yeni müharibə qurursanız, bunun heç bir faydası olmayacaq".
Onun fikrincə, Tramp Ukraynaya yardımı dayandırarsa, Avropa İttifaqı və Böyük Britaniya öz yardımlarını gücləndirməli olacaq. Lakin diplomat qeyd edib ki, bu yardım Amerika yardımını əvəz edə bilməz və müvəqqəti xarakter daşıyır. Amma keçmiş nazir bildirir ki, söhbət təkcə puldan deyil, həm də texnologiyadan gedir.
"Amerika peykləri və Amerika şirkətlərinin proqram təminatı olmasaydı, Ukrayna indiki vaxta qədər sağ qala bilməzdi. Avropa ölkələrinin tammiqyaslı müasir müharibədə Ukraynanı dəstəkləmək üçün silah arsenalı yoxdur", deyə britaniyalı diplomat bildirib.
Eyni zamanda, o əlavə edib ki, bu, təkcə Ukraynaya aid deyil - heç bir ölkə ABŞ-ın köməyi olmadan özünü müdafiə edə bilməz:
"Əgər bir ölkə davamlı hücuma məruz qalırsa, ABŞ-ın xoşməramlı və səxavəti olmadan sağ qalması çox çətin olar".
Poliqon.info
