Argentina yığmasının ulduz hücumçusu və kapitanı Lionel Messi Paraqvay yığmasına qarşı oyunda xoşagəlməz davaranışı ilə yadda qalıb.
Arena.az xatırladır ki, Argentina yığması 2026-cı il dünya çempionatının CONMEBOL bölgəsi seçmə mərhələsinin 11-ci turunda Paraqvay yığmasına səfərdə 1:2 hesabı ilə məğlub olub – meydan sahibləri əzmkar qələbə qazanıblar.
“Leo” məhsuldar fəaliyyəti ilə diqqət çəkməyib, amma “tərbiyəsini” nümayiş etdirib. Belə ki, Messi oyunun baş hakiminə yaxınlaşaraq, ədalət təmsilçisini kobud surətdə təhqir edib.
“RMC Sport” dərgisinin məlumatına görə, “Leo” hakimi, rəqib oyunçusunun kobud oyunu müqabilində onu meydandan qovmadığına görə “bəzəyib”: “Sən özünü buraxmısan (böyük bayıra getmək mənasında), mənim səndən xoşum gəlmir”, deyə “Leo” qəzəbini ifadə edib.
Məsələnin digər təfərrüatı açıqlanmır. Belə ki, müvafiq hal oyun protokoluna daxil edilibsə, Messi cərimə ödəməli və töhmətlə üzləşməli olacaq.
Məğlubiyyətinə rəğmən, Argentina yığması yarış cədvləlində zirvədəki yerini qoruyub saxlayıb. “Albiseleste” 11 turdan sonra 22 xalla 1-ci pillədədir. Paraqvay yığması isə 16 xalla 6-cı yerdə qərarlaşıb.
Lionel Messi 2023-cü ilin yayından MLS təmsilçisi “İnter Mayami”də çıxış edir. Argentinalı ulduz amerikan klubuna PSJ-dən azad agent qismində qoşulub. “Leo”nun “İnter Mayami” ilə müddəti 2025-ci ilin dekabr ayının sonuna qədər qüvvədə olacaq müqaviləsi var.
Argentinalı ulduz cari mövsümdə “İnter Mayami”nin heyətində bütün yarışlarda 25 oyuna çıxıb, 23 qol vurub və 13 məhsuldar ötürmə verib. Təcrübəli ulduzun “İnter Mayami” karyerası ümumilikdə 39 oyun, 34 qol və 18 məhsuldar ötürmədən ibarətdir.
“Leo” hazırda kapitanı olduğu Argentina yığmasında 2005-ci il avqustun 17-də debüt edib. Ulduz hücumçu yığmada 190 oyun keçirib, 112 qol vurub və 60 məhsuldar ötürmə verib. Bu göstəricilər üzrə “Leo” yığmanın mütləq rekordçusudur.
Argentinalı superulduz Argentina yığması ilə Yay Olimpiya Oyunlarının (2008), Amerika Kubokunun (2021, 2024), FIFA Dünya Kubokunun (2022), Çempionların CONMEBOL-UEFA Kubokunun (2022) qalibi olub. Həmçinin Messi dünya çempionatının (2014) və Amerika Kubokunun gümüş (2007, 2015, 2016) mükafatçısı olub.
“Leo”nun qənimətlər muzeyində müxtəlif fərdi mükafatlar, həmçinin 8 “Qızıl top”u var.
