Vaqif Cavadovun gəlişindən sonra 3 oyunda 2 qələbə qazanan “Sumqayıt”ın növbəti sınağı “Araz-Naxçıvan”a qarşı idi.
İnsaf naminə, “kimyaçılar” bu dəfə də pis görünmədi. Layiqli mübarizə apardı, qol imkanları yaratdı, lakin son dəqiqələrdə buraxılan qolla uduzdu.
Sərgilənən oyun Sumqayıtdan Mərdəkana üz tutan azarkeşlərin ürəyincə idi. Hər halda, bunu onların komandaya münasibətindən görmək çətin deyildi.
Hakimin final fiti səslənən kimi komanda üzvlərini tribunanın önünə səsləyən fanatlar onları ayaq üstə alqışlamaqla diqqət çəkdi.
Bu jest növbəti matçlar üçün motivasiya idi. Ki, bu dəfə məğlub olsanız da, sizə “çox sağ ol” düşür. Ancaq qarşıdakı oyunlarda bizi qələbələrlə sevindirin.
Yeri gəlmişkən, Vaqif Cavadov 90 dəqiqənin gedişində bir neçə dəfə tribunalardan özünün ad-soyadını eşitdi. Reaksiyası necə oldu? Bir əlini ürəyinin üstünə qoyub, digərini havaya qaldırmaqla təşəkkür etdi.
HƏBİB / SPORTİNFO.AZ
