Papa Fransisk: “Qəzzada soyqırım iddiaları diqqətlə araşdırılmalıdır”
Papa Fransisk, İsrailin Qəzzadakı hərbi əməliyyatlarına dair soyqırım iddialarının diqqətlə araşdırılmasının vacibliyini vurğulayıb.
Musavat.com bu barədə CNN televiziyasına istinadla məlumat verir.
CNN xüsusi vurğulayır ki, bu açıqlama onun İsrailin Qəzzadakı hərbi əməliyyatlarına qarşı ən sərt tənqidlərindən biri hesab olunur.
Yeni nəşr olunacaq kitabının yayımlanan hissələrində Papa, bəzi beynəlxalq ekspertlərin Qəzzada baş verənlərin soyqırım xüsusiyyətləri daşıdığını qeyd etdiklərini bildirib. O, bu iddiaların beynəlxalq hüquq çərçivəsində diqqətlə araşdırılmasının zəruriliyini vurğulayıb.
2023-cü ilin dekabrında Cənubi Afrika, İsraili soyqırım konvensiyasını pozmaqda ittiham edərək Beynəlxalq Ədalət Məhkəməsinə müraciət edib. 2024-cü ilin yanvarında məhkəmə İsrailə əsgərlərinin soyqırım aktları törətməməsini təmin etməyi tapşırıb. Lakin məhkəmə hələ də Qəzzada soyqırımın baş verib-vermədiyi barədə yekun qərarını verməyib.
İsrail hökuməti bu ittihamları rədd edərək, hərbi əməliyyatlarının yalnız Həmas və digər silahlı qruplara qarşı yönəldiyini bildirib. İsrailin Müqəddəs Taxt-Tacdakı səfiri Yaron Sideman, Papa Fransiskin açıqlamalarına cavab olaraq, 7 oktyabr 2023-cü ildə İsrail vətəndaşlarına qarşı “soyqırım xarakterli qətliam” törədildiyini və İsrailin özünü müdafiə hüququndan istifadə etdiyini qeyd edib.
Papa Fransisk, son zamanlarda Həmas tərəfindən əsir götürülmüş və sonradan azad edilmiş şəxslərlə Vatikanda görüşüb. O, həmçinin İsrailin Həmasa qarşı müharibəsində uşaqların ölümünü və Livana edilən hücumları tənqid edib.
Musavat.com
