EN

AİB Azərbaycan hökumətinin enerji keçidini sürətləndirmək üçün prioritetlərini yüksək qiymətləndirir

AİB

Bakı, 2 sentyabr, AZƏRTAC

Asiya İnkişaf Bankının (AİB) enerji üzrə baş direktoru Priyantha Vijayatunga Azərbaycanın enerji keçidi və onun genişləndirilməsi üçün strateji inkişaf prioritetlərini, o cümlədən ölkədə yaşıl dəhlizlərin planlaşdırılmış inkişafı, bərpa olunan enerji infrastrukturu, enerji şəbəkəsinin genişləndirilməsi və dekarbonizasiya məsələlərini müzakirə etmək üçün Azərbaycan rəsmiləri ilə görüşüb.

AİB-dən AZƏRTAC-a bildirilib ki, səfər zamanı Priyantha Vijayatunqa maliyyə naziri Samir Şərifov, hökumət rəsmiləri və digər aidiyyəti qurumlarla görüşlər keçirib.

“Biz ölkənin enerji keçidini sürətləndirmək üçün hökumətin prioritetlərini yüksək qiymətləndiririk. AİB və Azərbaycan arasında tərəfdaşlığın 25 illiyini qeyd etdiyimiz vaxtda, AİB ölkənin inkişaf məqsədlərinə dəstək olmaq öhdəliyini bir daha vurğulayır”, - deyə Priyantha Vijayatunga qeyd edib.

Son 25 ildə AİB Azərbaycanın enerji sektoruna 1,7 milyard dollar sərmayə qoyub. 2030-cu ilə qədər Azərbaycanda bərpaolunan enerjinin payının 30 faizə çatması, həmçinin yaşıl dəhlizlərin inkişafı, o cümlədən Xəzər dənizinin sualtı kabel layihəsi, elektrik ötürücü və paylayıcı şəbəkələrin gücləndirilməsi və enerjinin genişləndirilməsi kimi əsas strateji prioritetlər Azərbaycan və AİB-in gələcək tərəfdaşlığının əsasını təşkil edəcək.

Baş direktor həmçinin AİB-in birgə maliyyələşdirdiyi Azərbaycanda ilk bərpaolunan günəş enerjisi layihəsi kimi tanınan Ələt qəsəbəsi yaxınlığındakı Masdar şirkətinin 230 meqavatlıq Qaradağ Günəş Elektrik Stansiyasının uğurla ərsəyə gəlməsini, eləcə də gələcəkdə tamamlanacaq 1 giqavatlıq günəş və külək layihələrini müzakirə edib. O, həmçinin COP29 tədbirinin keçiriləcəyi əsas məkan olan Bakı Olimpiya Stadionunun yaxınlığında, Böyükşor gölündə 100 kVt-luq Üzən Günəş Fotovoltaik (FPV) Pilot Layihəsinin bu yaxınlarda istifadəyə verilməsi münasibətilə Energetika Nazirliyini təbrik edib.

Asiya və Sakit Okean regionunun iqlim bankı kimi AİB, həmçinin noyabrda Bakıda keçiriləcək BMT-nin iqlim sammiti ərəfəsində potensialın gücləndirilməsi də daxil olmaqla, Azərbaycanın COP29-da sədrliyini dəstəkləyir.

Azərbaycanın banka üzv olduğu 1999-cu ildən etibarən AİB dövlət və özəl sektora, o cümlədən nəqliyyat, enerji, səhiyyə və kənd təsərrüfatı sahələrinə 5 milyard dollardan çox vəsait ayırıb. AİB ifrat yoxsulluğun aradan qaldırılması üçün səylərini davam etdirməklə yanaşı, firavan, əhatəli, davamlı və dayanıqlı Asiya və Sakit Okean regionuna nail olmaq öhdəliyinə sadiqdir. AİB 1966-cı ildə yaradılıb, 49-u regiondan olmaqla bankın 68 üzvü onun səhmdarlarıdır.

Bütün xəbərləri reklamsız oxumaq üçün

Günlük ölkədə baş verən xəbərləri bizdən izlə.

Chosen
49
50
azertag.az

10Sources