![Prezident](/uploads/posts/2024-09/pr-xeqani-1.jpg)
Azərbaycan Respublikasının Prezidenti İlham Əliyev sentyabrın 14-də Bakının Səbail rayonunda yerləşən “Xəqani” bağında və ətraf ərazilərdə aparılmış abadlıq və yenidənqurma işlərindən sonra yaradılan şəraitlə tanış olub.
Reyting.az-ın xəbərinə görə, Bakı Şəhər İcra Hakimiyyətinin başçısı Eldar Əzizov dövlətimizin başçısına bağda həyata keçirilən abadlıq-yenidənqurma işləri barədə məlumat verib.
Bildirilib ki, “Xəqani” bağının mövcud ərazisi genişləndirilib, istirahət guşəsinin ətrafındakı Rəsul Rza, Qoqol və Xəqani küçələrində avtomobil yolları ləğv edilərək piyadaların istifadəsinə verilib. Ümumi ərazisi 1,4 hektar olan bağın ərazisində yaşıllaşdırma, işıqlandırma işləri görülüb, müasir oturacaqlar quraşdırılıb, uşaq əyləncə zonası yaradılıb və ətrafda olan yaşayış binalarında təmir-bərpa işləri aparılıb.
Qeyd edək ki, bu, dövlətimizin başçısının Bakı şəhərində parkların, xiyabanların əsaslı təmiri və yenidən qurulması ilə bağlı tapşırıqlarına əsasən abadlaşdırılan növbəti istirahət guşələrindən biridir. Şəhərin mərkəzində yerləşən bağda sakinlərin istirahəti üçün qısa müddətdə gözəl şərait yaradılıb.
Bu bağın Formula 1 Azərbaycan Qran-Prisinin keçirildiyi bir zamanda və Bakının ev sahibliyi edəcəyi BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası (COP29) ərəfəsində istifadəyə verilməsi ölkəmizə gələcək turistlərin istirahətinin səmərəli təşkilinə də böyük töhfə olacaq.
Xatırladaq ki, paytaxtımızda ən müasir parklar və yeni yaşıllıq zolaqları salınır, Bakının qədim tarixi memarlıq nümunələri bərpa edilir və müasir binalar tikilib istifadəyə verilir. Bu işlərin hamısı şəhərə daha çox gözəllik və kolorit verir, məhz bunun sayəsində Azərbaycan paytaxtı insanların həyatı və asudə vaxt keçirməsi üçün rahat məkana çevrilir. Yeni parkların salınması və mövcud olanların yenidən qurulması, “Yaşıl dünya naminə həmrəylik ili” çərçivəsində tədbirlər də ətraf mühitin sağlamlaşdırılması işinə mühüm töhfə verir.
![](/uploads/posts/2024-09/1726292817.jpg)
![](/uploads/posts/2024-09/19c5606e-6079-382c-af9d-53a689375865.jpg)
![](/uploads/posts/2024-09/3cc9be70-48bd-342e-ae4b-b5cc651929b3.jpg)
![](/uploads/posts/2024-09/8472faad-b888-36f0-9d89-b64c1858a7ab.jpg)
![](/uploads/posts/2024-09/f08e7ed5-5f89-35ae-aa13-3d7f2a0bc416.jpg)
![](/uploads/posts/2024-09/ilham-eldar-ezizov.jpg)
![](/uploads/posts/2024-09/68c74896-2c98-3182-8463-229ddd157c19.jpg)
![](/uploads/posts/2024-09/e016816c-21b2-380e-b7ce-021ce197e56f.jpg)
![](/uploads/posts/2024-09/8bee5da0-952a-3618-8496-adcfa58b7957.jpg)
![](/uploads/posts/2024-09/ilham-eldar.jpg)