İspaniyanın aparıcı universitetlərindən birinin tədqiqatçıları yaxın illərdə yağıntılarda qorxulu azalma müşahidə ediləcəyini bildiriblər. Bu cür dəyişikliklər regionun Aralıq dənizi iqlimindən tez-tez səhra mühiti ilə əlaqələndirilən çöl iqliminə keçidinin başlanğıcı olacaq.
Gundem.az bildirir ki, tədqiqat UPC Torpaq Siyasəti və Qiymətləndirmə Mərkəzinin ekspertləri tərəfindən aparılıb. Təhlillər göstərib ki, İspaniyada yağıntılar 2050-ci ilə qədər inanılmaz dərəcədə - 20% azala bilər. Beləliklə, növbəti onilliklər ərzində Mayorka kimi məşhur tətil yerləri isti dalğaları, quraqlıq və meşə yanğınları ilə müşaiyət olunacaq.
Tədqiqatın müəllifləri xəbərdarlıq edir ki, əsrin ortalarına qədər İspaniyada iqlim nəzərəçarpacaq dərəcədə quru olacaq və istiləşəcək, ölkədə çöllər və hətta səhralar üstünlük təşkil edəcək.
Komanda hesab edir ki, hazırkı qlobal istiləşmə modelləri ölkə üzrə yağıntıların paylanmasına böyük təsir göstərəcək və geniş yayılmış quraqlıqlara səbəb olacaq. Bu cür dalğalanmalar həm də güclü yağış dövrlərinə səbəb ola bilər ki, bu da öz növbəsində daşqınlara gətirib çıxara bilər. Çünki həddindən artıq qurumuş torpaq birdən-birə böyük miqdarda suyu uda bilməz.
UPC professorları Cozep Roka Klader və Blanka Arellanonun fikrincə, İspaniya 2050-ci ilə qədər fundamental dəyişikliklər yaşayacaq.
Artıq göstəricilər ölkədə ənənəvi hava rejimlərində əhəmiyyətli dəyişikliklərin yaşandığını göstərir. Məsələn, 1970-ci ildən İspaniyada istilik dalğalarının orta müddəti 3 gündən 9 günə qədər artıb.
Həmçinin, son 50 ildə İspaniya yayınının uzunluğu orta hesabla 36 gün artıb.
Bu yayın iyul ayında isə İspaniya ölkənin şərq hissəsini bürümüş genişmiqyaslı meşə yanğınları problemi ilə üzləşib.
