Arbitrajın Azərbaycanda tətbiqi, xüsusən də hüquqi mübahisələrin həlli prosesində alternativ üsul kimi özünü göstərir. Arbitraj, məhkəmə sistemi ilə müqayisədə daha çevik, sürətli və məxfi bir mexanizmdir. Azərbaycanda bu metodun inkişafı bir sıra müsbət nəticələr vəd edir.
Mövzu ilə bağlı Busaat.az-a açıqlama verən hüquqşünas Ayxan Məmmədli bildirib ki, bu sistem mübahisələrin sürəli həlli üçün önəmlidir:
“Arbitraj prosesi məhkəmə ilə müqayisədə daha tez başa çatır. Bu, xüsusən də kommersiya mübahisələrinin həllində mühüm əhəmiyyət daşıyır, çünki bizneslərin sürətli qərarlar alması onların fəaliyyətlərini daha effektiv şəkildə davam etdirməsinə imkan verir”.
Müsahibimiz qeyd edib ki, bu proses xarici investisiyalar üçün cəlbedici mühit yaradacaq:
“Arbitrajın geniş tətbiqi xarici investorlar üçün hüquqi zəmanətlər yaradır. Bu, xarici şirkətlərin Azərbaycanın iqtisadiyyatına investisiya qoyuluşunu artırmaq üçün mühüm bir amildir. Xarici investorlar, xüsusən də öz hüquqlarının qoruq altında olduğuna və mübahisələr zamanı obyektiv və tərəfsiz arbitrajın tətbiqinə güvənə biləcəklərinə əmin olduqda, ölkəyə daha çox sərmayə yatırmağa meylli olurlar”.
Ayxan Məmmədli Arbitrajın tətbiqi ilə məhkəmə sistemi üzərində olan yükü azalda biləcəyini qeyd edib. Onun sözlərinə görə, bu, məhkəmələrin işlərini daha səmərəli şəkildə icra etməsinə imkan yaradır, çünki arbitraj yolu ilə həll edilən mübahisələr daha az vaxt və resurs tələb edir. Arbitraj prosesi adətən xüsusi hüquqi bilik və təcrübəyə malik hakimlər tərəfindən icra edilir. Bu isə mübahisələrin daha dərin analitik biliklər və ixtisaslaşmış yanaşmalar əsasında həll edilməsinə imkan yaradır.
Azərbaycanda arbitrajın tətbiqindən söz açan hüquqşünas bu barədə fikirlərini bölüşüb:
“Azərbaycanda arbitrajın tətbiqi qlobal hüquqi standartlara uyğun olmaqla beynəlxalq aləmdə hüquqi əməkdaşlıq imkanlarını genişləndirir. Bu, Azərbaycan üçün hüquqi arenada daha güclü mövqe tutmağa və beynəlxalq mübahisələrin həllində rolunu artırmağa şərait yaradır. Arbitraj prosesi adətən məxfi olur, bu da tərəflərə öz kommersiya və şəxsi məlumatlarını açıq ictimaiyyətdə paylaşmaqdan qorunmaq imkanı verir. Xüsusilə, iş dünyası üçün bu, əhəmiyyətli bir üstünlükdür”.
Arbitrajın Azərbaycanda tətbiqi hüquqi sistemin daha müasir, çevik və beynəlxalq tələblərə uyğunlaşmasını təmin edir. Eyni zamanda bu, iqtisadiyyatın inkişafına, xarici investisiyaların artmasına və hüquqi proseslərin daha səmərəli aparılmasına töhfə verə bilər. Bu metodun genişlənməsi Azərbaycanın qlobal hüquqi və iqtisadi mühitdə daha da möhkəmlənməsi üçün mühüm addım olacaq.
