Şotlandiya sahillərində I Dünya Müharibəsində batdığı güman edilən 500-dən çox insanın olduğu gəmi tapılıb. Son dərəcə yaxşı vəziyyətdə olan gəmi 100 ildir dənizin dibində idi.
Publika.az “The Independent” nəşrinə istinadla xəbər verir ki, uzunluğu 118 metr və eni 18 metr olan “HMS Hawke” ilk dəfə 1891-ci ildə buraxılıb. Britaniya Kral Donanmasına aid olan gəmi uzun illər xidmət etmiş, lakin I Dünya Müharibəsi zamanı ömrünü başa vurmuşdu.
Gəmi 1914-cü il oktyabrın 15-də torpedo ilə vurulub. Partlayışdan 70 nəfər sağ çıxa bilsə də, gəmidə olan digər 524 nəfər xilas ola bilməyib. Şotlandiya sularında batan gəmilərin axtarışı ilə məşğul olan “Lost in Waters Deep” təşkilatı avqustun 12-də verdiyi açıqlamada nəhayət “HMS Hawke”i tapdıqlarını açıqlayıblar.
Dağıntıları müəyyənləşdirmək üçün “Lost in Waters Deep” təşkilatı ilk olaraq sualtı qayıq komandirinin gündəliyini araşdıraraq torpedonun nə vaxt atıldığını anlamağa çalışıb. Daha sonra gəminin harada batdığını müəyyən etmək üçün Kral Donanmasının qeydlərinə baxıblar.
