“Əl-Əhli”nin ulduz oyunçu Neymar hesab edir ki, “Real”ın braziliyalı hücumçusu Vinisius Junior qədər heç kim “Qızıl top”a layiq deyil.
Arena.az braziliyalı futbolçunun bu barədə fikrini təqdim edir:
“Mən “Qızıl top”a namizədlər arasında Vinisiusun tərəfdarıyam. Ondan başqa heç kim buna layiq deyil. O, bir döyüşçüdür, həyatı boyu çox əziyyət çəkib, bütün gözləntiləri aşıb, bütün tənqidlərə, istehzalara qalib gəlib və bu gün bizim üçün böyük kumirə, qəhrəmana çevrilib”, deyə Neymar fikrini əsaslandırıb.
Xatırladaq ki, ən nüfuzlu fərdi mükafatın 68-ci mükafatlandırma mərasimi oktyabrın 28-də Parisdə baş tutacaq.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 12 oyuna çıxıb, 4 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 276 oyun, 87 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
