“Real”ın braziliyalı hücumçusu Vinisius Junior La Liqanın 11-ci turunda evdə “Barselona”ya 0:4 hesablı məğlubiyyətə dair danışıb.
Arena.az məlumat verir ki, braziliyalı ulduz özünün “X” sosial şəbəkə hesabı üzərindən “blauqrana”nın bu möhtəşəm qələbəsi mənzərəsində vəd verib:
“Həmişə olduğu kimi biz geri dönəcəyik! Biz ən böyük klubuq, bunu artıq bilirsiniz!”, – “Vini” paylaşıb.
Braziliyalı hücumçu həmçinin “el klasiko” çərçivəsində yaşanmış irqi qalmaqala dair fikrini açıqlayıb:
“Təəssüf ki, dünən “Santyaqo Bernabeu”da irqçi təhqirlər yaşandı. Bu cinayətkarların cəmiyyətimizdə yeri yoxdur. Lamin Yamalı, Ansu Fatini və Rafinyanı tam dəstəkləyirəm. Bilirəm ki, Madrid və polis təqsirkarları tapıb cəzalandırmaq üçün əlindən gələni edəcək”, – “Vini” özünü “X” sosial şəbəkə hesabı üzərindən dərc edib.
11 turdan sonra 30 xal toplamış “Barselona” La Liqanın yarış cədvəlinə başçılıq edir. “Real” isə 24 xalla 2-ci pillədə qərarlaşıb.
Vinisius Junior “Flamenqo”nun yetirməsidir. Braziliyalı cinah hücumçusu “Real”a 2018-ci ilin iyul ayında 45 milyon avro məbləğ müqabilində elə, “Flamenqo”dan keçib. Vinisiusun İspaniya nəhəngi ilə müqaviləsi 2027-ci ilin iyun ayının sonuna qədər qüvvədədir.
Cari mövsümdə “Vini” madridlilərin heyətində 15 oyuna çıxıb, 8 qol və 7 məhsuldar ötürmə ilə fərqlənib. Vinisiusun “Real”da çıxışının ümumi mənzərəsi isə belədir: 279 oyun, 91 qol, 82 məhsuldar ötürmə.
“Vini” “qaymaqlılar”la İspaniya La Liqasının (2019/2020, 2021/2022, 2023/2024), İspaniya Kral Kubokunun (2022/2023), İspaniya Super Kubokunun (2019/2020, 2021/2022, 2023/2024), Çempionlar Liqasının (2021/2022, 2023/2024), UEFA Super Kubokunun (2022/2023, 2024/2025), FIFA Klub Dünya Kubokunun (2019, 2023) qalibi olub.
Vinisius Junior 2019-cu ilin sentyabrında debüt etdiyi Braziliya milli komandasının heyətində 35 oyun keçirib, 5 qol vurub və 5 məhsuldar ötürmə verib. “Vini” Braziliyanın U-15, U-17 komandaları ilə Cənubiamerikan Çempionatının qalibi olub.
“Transfermarkt” internet-portalı 24 yaşlı braziliyalı sol vingerin transfer dəyərini 200 milyon avro məbləğində qiymətləndirir. Bu məbləğ “Vini”nin dünyanın ən bahalı iki futbolçusundan biri olması deməkdir.
