Bakıda ötən ay yağan intensiv yağışlar nəticəsində Xətai rayonundakı 269 saylı məktəbin də hasarı aşıb.
“Qafqazinfo” xəbər verir ki, “Bakı Gündəliyi” səhifəsinin yaydığı məlumata görə, hadisədən 12 gün keçsə də, bərpa işləri aparılmır: “Hasar oktyabrın 21-də axşamdan başlayan leysan ərəfəsində dağılıb. Lakin hadisədən 12 gün keçsə də, hasarın yenidən qurulması üçün iş görülməyib. Hasarın dağılan hissəsi demək olar, məktəbin əsas girişi ilə üzbəüzdür və uşaqlar bura tez-tez yaxınlaşır. Bundan başqa, hasarın digər hissəsinin də aşmaq təhlükəsi var.
Əlavə olaraq qeyd edilib ki, beş il əvvəl avqust ayında da baş verən güclü yağıntı zamanı bu məktəbin hasarı dağılıbmış.
Məsələ ilə bağlı Xətai rayon İcra Hakimiyətinə sorğu ünvanladıq. Qurumdan “Qafqazinfo”ya bildirildi ki, İcra Hakimiyyəti tərəfindən aidiyyəti qurumlara məlumat verilib. Məsələ nəzarətdə saxlanılır.
Xatırladaq ki, sözügedən yağışlar nəticəsində Mərdəkan qəsəbəsində yerləşən 123 saylı orta məktəbin həyətyanı ərazisini əhatə edən hasarın da bir hissəsi uçmuş, tədris prosesi müvəqqəti dayandırılmışdı.
