Futbol üzrə Azərbaycan millisinin yarımmüdafiəçisi Emil Mustafayev Ukraynanın “Polesye” komandasının heyətində növbəti matçına çıxıb.
Arena.az xəbər verir ki, azərbaycanlı futbolçu Ukrayna çempionatının (Premyer Liqa) 2024/2025 mövsümünün 12-ci turu çərçivəsində baş tutan “Aleksandriya” ilə matçın iştirakçısı olub.
“Polesye” bu rəqiblə səfərdə qarşılaşıb. Emilin komandası meydanı məğlubiyyətlə tərk edib – 0:1.
Mustafayev bu görüşün 68-ci dəqiqəsində meydana buraxılıb. Emilin sabiq komandası indiki klubunu məhz o meydana çıxdıqdan sonra (83-cü dəqiqədə) məyus edib.
Qeyd edək ki, bu, “Polesye”nin 2024/2025-ci illər mövsümündəki ilk məğlubiyyətidir.
Xatırladaq ki, Emil Mustafayev Ukraynanın digər klubu “Aleksandriya”nın yetirməsidir. Hücumameyilli yarımmüdafiəçi 2023-cü ilin iyul ayında azad agent kimi “Polesye”yə keçib. 22 yaşlı futbolçu indiyə qədər bu komandanın heyətində 30 oyuna çıxıb, 3 qol vurub, 5 məhsuldar ötürmə verib.
Vaxtilə Azərbaycanın U-21 yığmasında 3 oyun keçirmiş Mustafayev 2024-cü ilin mart ayında əsas millimizdə də debüt edib. Yarımmüdafiəçi Azərbaycan millisinin heyətində 5 oyuna çıxsa da, fərqlənə bilməyib.
Bu mövsüm keçirdiyi 11 oyuna 22 xal toplamış “Polesye” Premyer Liqanın turnir cədvəlində 16 iştirakçı arasında 4-cü yerdə qərarlaşıb. Emilin komandası 6 qələbə qazanıb, 4 heç-heçə edib və 1 məğlubiyyətlə üzləşib.
