Kafedə gəncələr arasında hesab davası: “Payınıza düşəni ödəməyənin anasını-bacısını...” — TƏFƏRRÜAT
Demokrat.az-ın əldə etdiyi məlumata görə, Rahib qardaşı Ərəstun, tanışları İslam və Cəfər ilə birlikdə İsmayıllı şəhərində yerləşən “Bahar” adlı kafedə spirtli içkilər qəbul ediblər.
Daha sonra gecə saat 3 radələrində oradan getmək istədikləri vaxt əvvəldən aralarında olan razılaşmaya baxmayaraq birlikdə olan Cəfər hesabı ödəməyəcəyini bildirib. Buna görə də Rahib kafedən çıxıb və Cəfəri kafedən çölə çağıraraq küçədə onunla mübahisə edib.
Mübahisə zamanı Cəfər onlara “sizin barənizdə hesabı ödəməyənin...” deyərək nalayiq ifadələr işlədib. Bu zaman Rahib Cəfərin onun ünvanına nalayiq ifadə işlətməsi səbəbindən əsəbiləşib və şəxsi münasibətlər zəminində aralarında yaranmış mübahisə ilə əlaqədar yanında olan tanışı İslamın şalvarının arxa cibində olan qatlanan cib bıçağını götürərək Cəfərin qarın nahiyəsindən bir dəfə zərbə vurub.
Hadisəni törədən Rahibin barəsində Cinayət Məcəlləsinin 126.1-ci (qəsdən sağlamlığa ağır zərər vurma) maddəsi ilə ittiham elan edilib.
Cinayət işi üzrə təqsirləndirilən şəxs qismində ifadə verən Rahib ona elan olunmuş ittiham üzrə özünü təqsirli bilib.
O, ifadəsində göstərib ki, hadisə günü, gecə saat 1 radələrində qardaşı Ərəstun, tanışı İslam və sonradan şəxsiyyəti ona məlum olan Cəfər ilə birlikdə İsmayıllı şəhərində yerləşən kafedə təxminən bir saat pivə içdikdən sonra artıq gec olduğu üçün kafedən durmağı qərarlaşdırıblar:
“25 manat təşkil edən hesabı ödəmək üçün Cəfər bizə özündə pul olmadığına görə hesabı verməyimizi dedi. Cəfərə pulu verə bilməyəcəyimizi, həmin yerə bizi Cəfərin gətirdiyini bildirdim. Buna görə də aramızda mübahisə yarandı. Mübahisə edə-edə kafedən çölə çıxdıq. Qardaşım Ərəstun da kafedən çıxaraq yanımıza gəldi. Kafedən bir qədər aralıda mübahisə zamanı Cəfər sifət nahiyəmdən bir dəfə şillə ilə zərbə vurdu. Zərbənin təsirindən yerə yıxıldım. Yerdə olan zaman Cəfər bizə “sizin payınıza düşən hesabı ödəməyənin anasını-bacısını...” deyərək nalayiq ifadələr işlətdi. Bu zaman yerdən qalxaraq yanımda dayanmış İslamın arxa cibindən açılıb bağlanan düyməli bıçağını götürərək Cəfərin qarın nahiyəsindən bir dəfə zərbə endirdim. Zərbədən Cəfər bir neçə addım geriləyərək yerə oturdu. Ərəstun isə həmin vaxt bıçağı əlimdən alaraq İslama verdi. İslam isə bıçağı var gücü ilə uzağa atdı. Bundan sonra Ərəsun yoldan keçən Asim adlı rayon sakinini köməyə çağırdı. Bir qədər sonra tibbi yardım əməkdaşları gələrək Cəfəri xəstəxanaya apardı. Asim isə məni və qardaşım Ərəstunu oradan polis şöbəsinə gətirdi. Həmin zaman İslam artıq qaçaraq oradan uzaqlaşdı”.
İş üzrə zərərçəkmiş qismində ifadə verən Cəfərin sözlərinə görə, hadisədən əvvəlki gün saat 22 radələrində İsmayıllı şəhərində parkdan çıxaraq yaşadığı evə tərəf getdiyi yolun üstündə olan “Lüks” marketə girib:
“Siqaret alaraq çıxan zaman marketin qarşısında üzdən tanıdığım, şəxsiyyətinin sonradan mənə məlum olduğu Rahib, Ərəstun və İslamı gördüm. Onlara yaxınlaşaraq hal-əhval tutdum. Bir qədər söhbət etdikdən sonra birlikdə spirtli içki içmək qərarına gəldik. Bu məqsədlə İsmayıllı şəhərində yerləşən marketin ikinci mərtəbəsində olan çay evinə getdik. Orada bir qədər pivə içdikdən sonra Rahib kafeyə getməyi, orada pivə içməyi və həmin yerdə olan hesabı özlərinin ödəyəcəklərini bildirdi. Biz masadan qalxdıqda mən 35 manat hesab ödədim”.
Zərərçəkmiş şəxs qeyd edib ki, gecə saat 2 radələrində birlikdə Rahibin dediyi kafeyə gediblər:
“Orada hərəmizə 2 bakal pivə içdikdən sonra Rahib mənə hesabı ödəməyimi söylədi. Üzərimdə pul qalmadığını, həmçinin aramızda olan razılaşmaya əsasən hesabı Rahibgilin ödəməli olduğunu bildirdim. Bu zaman aramızda söz mübahisəsi yarandı. Mübahisə zamanı Rahib məni çölə dəvət edərək mübahisəni orada davam etdirdik. Kafenin qarşısında olan küçədə olan zaman Rahib və qardaşı Ərəstun üzərimə gəldi. Bu zaman Rahiblə Ərəstunu itələyərək özümdən kənarlaşdırdım. Rahib və qardaşı Ərəstun hesabı ödəməyimi, çıxaraq getməyi bildirdilər. Onlar təkrar üzərimə gəldilər. Ərəstun yumruqla məni vurmağa cəhd etdikdə hər ikisini bir daha itələyərək özümdən kənarlaşdırdım. Həmin vaxt qarın nahiyəmdə ağrı hiss etdim. İlk öncə Rahib qarnımdan yumruqla vurduğunu və bunun üçün ağrı hiss etdiyimi düşündüm. Lakin qarın nahiyəmə baxdıqda oradan qan axdığını, bundan başqa qarnımda bıçaq olduğunu gördüm. Həmin an Rahib qışqıra-qışqıra “mən vurdum, mən vurdum” deyə bildirdi və qaçaraq oradan uzaqlaşdı. Həmin vaxt huşumu itirdim. Özümə gəldiyim zaman Qəbələ rayon mərkəzi xəstəxanasında olduğumu gördüm”.
Bu cinayət işinə Şəki Ağır Cinayətlər Məhkəməsində baxılıb. Məhkəmənin hökmü ilə Rahibin barəsində Cinayət Məcəlləsinin 70-ci (şərti məhkum etmə) maddəsi tətbiq olunub. Ona 2 il sınaq müddəti olmaqla 3 il şərti cəza verilib.
Sınaq müddəti ərzində təqsirləndirilən şəxsin üzərinə onun davranışı üzərində nəzarəti həyata keçirən orqana məlumat vermədən daimi yaşayış yerini dəyişdirməmək, ictimai iaşə obyektlərinə getməmək və spirtli içki qəbul etməmək vəzifələri qoyulub. Onun davranışı üzərində nəzarətin həyata keçirilməsi İsmayıllı rayon İcra və Probasiya Şöbəsinə həvalə edilib.
Fariz Məlikli
Demokrat.az
