Lissabon “Sportinq”inin isveçli mərkəz hücumçusu Viktor Dyökereş Çempionlar Liqasında 4-cü tur həfətəsinin oyunçusu seçilib.
Arena.az bu barədə Çempionlar Liqasının rəsmi sosial şəbəkə hesabına istinadən məlumat verir.
Dyökereş Çempionlar Liqasının 4-cü turu çərçivəsində “Joze Alvalade” stadionunda keçirilmiş oyunda (4:1) İngiltərə çempionu “Mançester Siti”nin qapısına 3 qol vurub.
Səsvermədə 2-ci yeri “Bayer”lə oyunda (4:0) het-trikə imza atmış kolumbiyalı hücumçu Luis Dias, 3-cü yeri isə “Leypsiq”lə oyunda (3:1) dübarə qolla fərqlənmiş, “Seltik”in alman hücumçusu Nikolas Kühn tutub. İlk dördlüyü isə “Feyenoord”la oyunda (3:1) iki qol vurmuş, “Zalsburq”un ivuarlı hücumçusu Kərim Konate qapayır.
Xatırladaq ki, Dyökereş həmçinin Çempionlar Liqasında vurduğu 5 qolla ən sərrast futbolçular arasında yer alıb. Bu ada hazırda 4 futbolçu şərikdir: Rafinya (“Barselona”), Harri Keyn (“Bayern”), Viktor Dyökereş (“Sportinq”) və Robert Levandovski (“Barselona”).
Mərkəz hücumçusu Viktor Dyökereş futbola “İFK Aspudden-Tellus” klubunda qədəm qoyub. Buradan “Brommapoykarna”ya keçmiş Dyökereş böyük futbolda debüt edib. Hücumçu karyerası ərzində “Brayton”, “Sankt-Pauli”, “Suonsi Siti” və “Koventri Siti”də çıxış edib.
2023-cü ilin iyulunda Lissabon “Sportinq”i Dyökreşi 24 milyon avro məbləğ müqabilində öz düşərgəsinə qatıb. İsveçli hücumçunun “şirlər”lə müqaviləsinin müddəti 2028-ci ilin iyun ayının sonuna qədər qüvvədədir.
Cari mövsümdə Dyökereş “Sportinq” üçün bütün yarışlarda 17 oyuna çıxıb, 23 qol vurub, 4 məhsuldar ötürmə verib.
İsveçli hücumçunun “şirlər”in heyətində çıxışının ümumi mənzərəsi 67 oyun, 66 qol və 19 məhsuldar ötürmədən ibarətdir.
Hazırda Dyökereş cari mövsüm Portuqaliya Premyer Liqasının 16 qolla ən sərrast futbolçusudur.
Viktor Dyökereş 2019-cu ilin yanvarında debüt etdiyi İsveç yığmasının heyətində 24 oyun keçirib, 10 qol vurub, 5 məhsuldar ötürmə verib.
Viktor Dyökereşin qənimətlər muzeyində “Sportinq”lə qazandığı Portuqaliya çempionluğu (2023/2024) var. Fərdi uğurlara gəlincə, Dyökereş 29 qolla 2023/2024-cü illər Portuqaliya Premyer Liqasının ən sərrast qolçusu olub.
“Transfermarkt” internet-portalı 26 yaşlı isveçli mərkəz hücumçusu Viktor Dyökereşin transfer dəyərini 70 milyon avro məbləğində qiymətləndirir.
Əlavə edək qolçu hücumçu bir çox Avropa nəhənglərinin diqqət mərkəzindədir.
