Böyük Britaniyanın “Financial Times” qəzeti Donald Trampın proteksionist Robert Laythayzeri ABŞ ticarət siyasətinin rəhbəri təyin etməyi planlaşdırdığını yazıb.
“Cebhenfo.az”-ın məlumatına görə, Laythayzerin prezidentin nümayəndəsi təyin olunmaq ehtimalı yeni dövrdə ticarət müharibələrinin başlayacağı ilə bağlı narahatlıqları artırıb.
Donald Trampın Çinlə ticarət müharibəsinə başladığı zaman ABŞ-nin Ticarət Nümayəndəsi olan Robert Laythayzer yenidən səhnəyə çıxmağa hazırlaşır.
“Financial Times” qeyd edir ki, Trampın keçid komandasındakı müzakirələrlə tanış olan bir neçə nəfər bu vəzifəyə başqa bir şəxs üçün lobbiçilik etməsinə baxmayaraq, Laythayzerdən hökumətə qayıtması xahiş edilib.
Robert Laythayzer həmçinin, maliyyə naziri vəzifəsində işləməkdə maraqlı olduğunu bildirib.
Lakin bu vəzifə böyük ehtimalla maliyyə sektoruna yaxın şəxslərə təklif olunacaq. Maliyyə naziri postuna namizədlər arasında Skot Besent və Con Paulson da var.
Trampın birinci prezidentlik dönəmində Laythayzerin ticarət müharibələri zamanı nə qədər nüfuzlu olduğunu nəzərə alsaq, bir proteksionistin ticarət nümayəndəsi təyin edilməsi Pekində və ABŞ-nin ticarət müttəfiqləri arasında narahatlıq yarada bilər.
Kampaniya zamanı Tramp ABŞ-a idxal edilən bütün mallara, xüsusilə də Çin mallarına yüksək gömrük rüsumları tətbiq edəcəyini vəd edib.
Tramp Laythayzeri ticarət naziri təyin etmək üçün nəzərdə tutmuşdu.
Lakin təyinat danışıqları ilə tanış olan insanlar seçilmiş prezidentin bu işi böyük ehtimalla milyarder Linda MakMahona təklif edəcəyini bildirir.
